Жақында Оңтүстік Қазақстан облыстық сотының төрағасы Нұрсерік Шәріповтің бастамасымен Конституцияның 20 жылдығы мерекесіне орай «Билерге тағзым» атты велошеру өтті.
Қырық судья қатысқан велосипедшілер сапары облыстық соттың ғимараты алдындағы «Үш бидің» ескерткіші жанынан бастау алып, 40 шақырым жолды артқа тастағаннан кейін Ордабасы тауында орналасқан «Бірлік» монументіне табан тіреді.
Сапар алдындағы жиынға қатысушылардың атынан сөз сөйлеген облыстық соттың төрағасы Н.Шәріпов: «2015 жыл еліміз үшін мерейлі де мерекелі жыл болып басталды. Биыл елімізде Қазақ хандығының 550 жылдығы мен Ұлы Жеңістің 70 жылдығы және Қазақстан халқы Ассамблеясы мен Конституцияның 20 жылдықтарына орай түрлі іс-шаралар ұйымдастырылуда. Ең алдымен, бүгінгі тәуелсіз мемлекетімізге тұғыр болған Қазақ хандығының 550 жылдығын атап өтуге барынша көңіл бөлінуде. Соғыс ардагері, «Үш би» төсбелгісінің иегері, Қазақстанның «Құрметті судьясы», Мақтаарал ауданының «Құрметті азаматы» Айтжан Бекназаровпен, соғыс жылдары Ордабасы ауданында судьялық қызмет атқарған, тыл ардагері Жамал Шойбековамен аудандық, облыстық соттарда кездесулер өткізілді. Облыстағы екінші дүниежүзілік соғысқа қатысушы 24 судьяға «Даңқ тақтасы» орнатылды. Сонымен қатар, Қазақ хандығының 550 жылдығына орай Түркістан қаласындағы Қожа Ахмет Ясауи атындағы Халықаралық қазақ-түрік университетінде «Есім ханның ескі жолы – ауызша қағидалар жиынтығының озық үлгілері» атты аймақтық ғылыми конференция өтсе, оның аясында «Қазақ хандығының тарихындағы Түркістанның орны» тақырыбында және оған қоса сурет, кітап көрмелері ұйымдастырылды. Конференцияда Қазақ хандығы тұсындағы мемлекеттік билік, билер соты мен қазақтардың дәстүрлі құқығы тақырыбында белгілі тарихшы, заңгер, тілші ғалымдар мен зерттеушілердің баяндамалары тыңдалып, оның қорытындысы ретінде конференция материалдары өз алдына кітап болып басылып шықты. Енді, міне, Конституцияның 20 жылдығына арналған мына шара сол жобалардың жалғасы іспетті. Мұны өткізудегі мақсат биылғы мерейлі мерекелерді саламатты өмір салтымен ұштастыра отырып, бірліктің бастауы болған Ордабасы тауының мәртебесін Қазақ хандығының 550 жылдығында тағы бір мәрте жаңғырту болып табылады», деді төраға өз сөзінде.
Осыдан кейін Оңтүстік Қазақстан облысы әкімінің орынбасары Е.Айтаханов пен облыстық спорт саласы ардагерлері кеңесінің төрағасы А.Асқар құттықтау сөз сөйлеп, судьяларға сәтті сапар тіледі.
Түске таяу велосипедшілер 40 шақырым жолды басып өтіп, республикалық «Ордабасы» Ұлттық тарихи-мәдени қорығындағы» мәреге жетті. Оларды Ордабасы ауданының басшылары мен спорт қайраткерлері және ауыл тұрғындары салтанатты жағдайда қарсы алып, «Нұр Отан» партиясының аудандық филиалының төрағасы Ж.Бостандық велошеруге қатысушыларды құттықтап, сөз сөйледі. Ордабасы тауында орнатылған «Бірлік» монументіне гүл шоқтары қойылып, Төле, Қазыбек және Әйтеке билерге тағзым етілгеннен кейін, Ордабасы ауданының әкімі С.Сапарбаев, облыстық соттың судьясы А.Елшібаев және ауданның «Құрметті азаматы», еңбек ардагері Р.Битуғанов велошеруге қатысушыларға алғыстарын жеткізді. Жоба соңында облыстық соттың төрағасы Н.Шәріпов мұндай іс-шаралардың, әсіресе, кейінгі жастар үшін тәрбиелік мәні өте зор екендігін атап өтті.
Қабыл ДҮЙСЕНБИ,
ОҚО сотының Ақпараттық қамтамасыз ету бөлімінің
басшысы.
