Мысырда құрылған қоғамдық бірлестік

Қазақстанның Каир қаласындағы елшілі­гін­де еліміздің дипломаттары және Мысыр қауым­дастығы өкілдерінің арасында Қазақ­стан-Мысыр ынтымақтастығын дамыту жолда­ры туралы пікір алмасу үшін дәстүрлі кездесу өтті. Аталған шараға Мысырдың көрнекті қоғам және мемлекет қайраткерлері, сараптамалық және ғылыми орталардың, іскер топтардың өкілдері, сондай-ақ, жетекші БАҚ журналистері қатысты. Кездесуде Қазақстан елшісі Берік Арын қонақтарды Қазақстанның ішкі саяси өміріндегі аса маңызды оқиғалармен, атап айтқанда, елімізде жуырда өткен президенттік сайлаудың нәтижелері туралы хабардар етті. Сауда-экономикалық байланыстарды кеңейту мәселелерін талқылау барысында қатысушыларға Президент Нұрсұлтан Назарбаевтың «Нұрлы Жол – болашаққа бастар жол» Жолдауы мен «Қазақстан- 2050» Стратегиясын іске асыру шеңберінде Үкіметтің дағдарысқа қарсы және ынталандыру шараларын қолға алып жатқандығы, сонымен қатар, Елбасы бастамасымен айқындалған бес институттық реформа туралы ақпарат берілді. Іс-шараға қатысушылар еліміздің мәдени-әлеуметтік өміріндегі жаңалықтар мен халықаралық бастамаларына, соның ішінде, алдағы өтетін Әлемдік және дәстүрлі діндер көшбасшыларының V съезіне қызығушылық танытты. Олар Қазақстанның тәуелсіздік жылдары қол жеткізген жетістіктерін жоғары бағалап, мұнда Президент Н.Ә. Назарбаевтың орасан зор еңбегі бар екенін атап өтті. Қатысушылар Қазақстан мен Мысыр арасындағы екіжақты қарым-қатынастарды нығайтуды және одан әрі дамытуды көздей­­тін «Қазақстан-Мысыр достығының қауым­дастығы» атты қоғамдық бірлестік құру туралы бастама көтеріп, оны бірауыздан қолдады. Қауымдастық төрағалығына «Қызыл теңіз» (Хургада қаласы) провинциясының басшысы А.Абдулла сайланды. Мысыр қоғамының белгілі өкілдері «Әл-Азһардың» жанынан құрылған үнқатысу орталығының төрағасы, Мысырдың бұрынғы Уақыфтар министрі Х.Зақзұқ, «Әл-Азһар» университетінің бұрынғы ректоры, доктор У. Әл-Абди, әр жылдары Мысырдың Қазақстанда елшілері болған Абдалла Әл-Арнуси мен Набила Саляма, «Әл-Ахрам» мен «Әл-Гумхурия» медиа-холдингтерінің және өзге де БАҚ-тардың журналистері, «Рехана Групп» компаниясының басшысы Я.Аббас пен басқа да бірқатар ірі кәсіпкерлер, белгілі қоғам қайраткерлері мен ғалымдар қауымдастықтың құрметті мүшелері болып кірді. «Егемен-ақпарат».