Телеарна ұжымы өздері отырғызған шырша ағашының түбіне құты-капсулаға салып аманат хат жазды. Бүгінгі аға буын өкілдерінің хатын енді 50 жылдан соң «Қазақстан-Павлодар» телеарнасы ақпараттық арнасының тілшілері алып оқитын болады.
Биыл «Қазақстан-Павлодар» телеарнасы 50 жылдығын атап өтеді.Осы орайда облыстың басты арнасы мерекелік жылға арналған «50 игі іс» жобасын бастап та кетті. Наурыз мерекесінде телеарна ауласына киіз үйлер тігіліп, дастарқан басына көпбалалы және тұрмысы төмен отбасылары шақырылды. Жоба барысында Жеңістің 70 жылдығына орай жерлес жауынгерлер жайлы көп сериялы бейне-кітап жарыққа шықты. Өткен сенбілік күні «50 игі іс» аясында телеарна ұжымы 85 түп ағаш отырғызды. Ағаштардың арасында өте сирек кездесетін Сібірдің көк шыршасы, қарағай, қайың сияқты бағалы көшеттер бар. Аллея ашылып, белгітас орнатылды. Жергілікті телеарна директоры Бауыржан Айтқазиннің айтуынша, алдағы уақытта көгеріп, көбейетін бұл аллея қала тұрғындары мен қонақтарының демалатын орнына айналады.
– Журналистер еккен жас қайыңдар, кішкене шыршалар жылдар өткен соң жайқалып өсіп, үлкен аллеяға айналатынына сенеміз. Біз қаламызды көріктендіруге үлес қостық деп білеміз, – деді Бауыржан Айтқазин. Алдағы уақытта «50 игі іс» атты жобасының шеңберінде соғыс ардагерлеріне, әлеуметтік аз қамтамасыз етілген отбасыларға қолұшын беріп, қолдау көрсетіледі. Сондай-ақ, өмір мен өлімнің арасында жатқан науқастарға донор болу ұйымдастырылмақ.
Фарида БЫҚАЙ, «Егемен Қазақстан».
ПАВЛОДАР.
