Аралда 253 млн. теңгені құрайтын 28 жоба жүзеге асуда

ҚЫЗЫЛОРДА. 19 қазан. Сыр өңіріндегі кәсіпкерлер палатасының Арал аудандық филиалы жанындағы кәсіпкерлікті қолдау орталықтары жұмысының нәтижесінде ауданда жалпы құны 253 млн. теңге болатын 28 жоба жүзеге асырылуда. Бұл туралы egemen.kz тілшісі хабарлады. Жалпы, Арал ауданы бойынша 3 500-ге жуық кәсіпкер бар. Солардың бірі Сайлаш Жұбаниязова. Аралға шет елден қонақтар жиі келеді. Осы орайда, қонақ үй бизнесімен айналысқан Сайлаш биылғы жылдың маусым айында аудандық кәсіпкерлер палатасының көмегімен өңірлік инвестициялық орталықтан қаржылай қолдау алып, қонақ үйін қайта жаңғыртудан өткізеді. 20 орындық қонақ үйде келушілерге барлық жағдай жасалған. Жайлы әрі жылы бөлмелер, кітапхана және асхана – барлығы талапқа сай. Жалпы, кәсіпкерлерді, оның ішінде ауыл тұрғындарының барлық қаржыландыру тетіктеріне қатысу белсенділігін арттыру мақсатында құрылған «Қызылорда» өңірлік инвестициялық орталығы облыста есепті кезеңде 249 млн. 64 мың тенге болатын 43 жоба қаржыландырылып, жұмыс жасауда. Ержан Байтілес. Дерек, сурет: egemen.kz.