Экономиканың өсу жолдары сөз болды

Премьер-Министрдің бірінші орынбасары Бақытжан Сағынтаев VІІІ Астана экономикалық форумының екінші жұмыс күні шеңберінде оған қатысушылармен бірқатар екіжақты кездесулер өткізді, деп хабарлады Премьер-Министрдің баспасөз қызметі. АҚШ Мемлекеттік хатшысының бас көмекшісі Курт Тонг пен Бақытжан Сағынтаев кездесу барысында Еуразиялық экономикалық одақ шеңберінде, сондай-ақ, Орталық Азия өңірінде сауда кедергілерін жою және тұтынушыларды қорғау мәселелерін талқылады. Сол сияқты, тараптар «Жібек жолының экономикалық белдеуі» бастамасы шеңберіндегі, соның ішінде, шетел компания­ларын тарта отырып, мүмкін деген инфрақұрылымдық жобаларға қатысты пікір алмасты. Гарвард университетінің профессоры Кеннет С.Рогофф әлемдік экономика дамуындағы өзгерістерге, сондай-ақ, экономикалық өсу қарқынын сақтау үшін Қазақстан қабылдауы тиіс нақты қадамдарға қатысты өз ойымен бөлісті. Кеннет С.Рогофф пен Бақытжан Сағынтаев AIFC Астана халықаралық қаржы орталығының болашақта жұмыс істеуі және қазақстандық бизнеске мемлекеттік қолдау шараларын талқылады. БҰҰ Экономикалық және әлеуметтік мәселелер департаментіндегі экономикалық даму мәселелері бойынша Бас хатшының ассистенті Ленни Монтьэль кездесу барысында Қазақстан Президенті Нұрсұлтан Назарбаев реформаларының тұрақты даму қағидаттарына сәйкес келетінін атап көрсетті. Оның айтуынша, ол мемлекеттік қызмет реформасын, сот жүйесінің салқынқандылығын қарастырып, сонымен бірге, мемлекетті өз азаматтары алдында неғұрлым мөлдір және есеп беретіндей жасайды.