Атырау облысында үшем дүниеге келді

АТЫРАУ. 19 қазан. Атырау облыстық перзентханасында жас ана Самал Жәкиева өмірге үшемді әкелді. Бұл туралы egemen.kz тілшісі хабарлады. Бұған дейін 4 жасар ұлын тәрбиелеп отырған бақытты ана Мақат ауданының тұрғыны екен. Ері Саламатпен бірге үлкен ұлына Қуандық деген есім беріпті. Енді олар жарық дүние есігін ашқан үш сәбиге Мұхаммад, Ариф және Әли есімін қалап отыр. «Өмірге келген балаларыма дәрігерлік көмегін аямаған дәрігерлер Түрлен Бегеева мен Айгүл Сүндетоваға ерекше алғысымды білдіремін. Үшемнің өмірге келуі Алланың үлкен сыйы деп қабылдап отырмыз», – дейді 25 жастағы бақытты ана Самал Жәкиева. Перзентхана дәрігерлері жас анаға жүктіліктің 33 аптасында ота жасады. Сөйтіп, ақ халаттылар үш бірдей сәбидің аман-есен жарық дүниеге келуін қамтамасыз етті. Қазір үшемді бауырына алған жас ана Самал Жәкиева отбасына оралды. Жолдасбек Шөпеғұл, Дерек: egemen.kz. Сурет: erketai.kz.