Қазақстан Жастар одағы және Халықаралық әдеби «Алаш» сыйлықтарының лауреаты ақын, жазушы Әділбек Ыбырайымұлының «Сөз киесі» атты әдеби-лирикалы шығармашылық кеші өткен жұмада талдықорғандықтарды әсерлі әлемге енгізе білді. Алматы облысының орталық Мәдениет сарайының кіреберісіндегі көрмеде тізілген 12 кітап атауының тың да тосындығы, сахна төрінде автор туындыларынан сыр шерткен бейнежазба – бәрі де жарасымды шыққан.
Әділбек Ыбырайымұлы дүйім жұрттың алдына шығып, парасатты ойын қара сөзбен бір қайырып, сезімге тұнып тұрған өлеңдерін оқығанда, халық ізгі ілтипатын толассыз қол соғумен білдірді. Бес белестің биігіне көтеріліп, туған жеріне келіп шығармашылық есеп бере білген астаналық азаматты Алматы облысы әкімінің орынбасары Бақтияр Өнербаев құттықтап, өңір басшысының және ресми тұлғалардың арнайы жолдаған хаттарын оқып берді.
