Футбол. Қазақстан кубогы. Жартылай финалдық жұптар белгілі болды

АСТАНА. Футболдан Қазақстан кубогының жартылай финалы үшін жеребе тарту рәсімі өтіп, қарсыластар белгілі болды. Бұл туралы Қазақстан футбол федерациясының баспасөз қызметіне сүйеніп, egemen.kz хабарлады. Жеребе қорытындысына сәйкес, аталған кезеңде Алматының «Қайраты» Қостанайдың «Тобылымен» күш сынасады. Ал екінші жартылай финалдық жұпты «Ақтөбе» мен «Астана» командалары құрады. Бұл сатыдағы тартыс екі ойыннан тұрады. Алғашқы матч 2 маусымда өтсе, қарымта кездесу 23 қыркүйекке жоспарланған. «Ақтөбе» мен «Тобыл» бірінші ойындарын өз алаңдарында өткізеді. Бірінші ойын. 2 маусым. «Тобыл» (Қостанай) – «Қайрат» (Алматы). «Ақтөбе» (Ақтөбе) – «Астана» (Астана). Қарымта ойын. 23 қыркүйек. «Қайрат» (Алматы) – «Тобыл» (Қостанай). «Астана» (Астана) – «Ақтөбе» (Ақтөбе). Қазақстан кубогының қазіргі иегері «Қайрат» командасы екенін айта кетейік. Ел кубогын иемденген клуб УЕФА Еуропа лигасының іріктеу кезеңдеріне қатысуға мүмкіндік алады. Еламан Қоңыр. Дерек: egemen.kz. Сурет: kaztrk.kz.