Солтүстікқазақстандық омарташылар экспортқа 100 тонна бал әзірледі

ПЕТРОПАВЛ. 24 мамыр.  Биылғы жылдың сәуір айында Қызылжар өңірінің арнайы делегациясы Біріккен Араб Әмірліктерінде болып, Елбасының қазақстандық өнімдерді насихаттау ұсынысын жүзеге асыру бастамасы шеңберінде бірқатар экономикалық, сауда-саттық мәмілелерге келіскен еді. Оған солтүстікқазақстандық бал өндірушілер бірінші болып үн қатып, 100 тонна сапалы бал өнімін Дубайға экспорттауды көздеп отыр. Бұл туралы egemen тілшісі хабарлады. Омарташылар мұндай табысқа БАЭ инвесторларымен ынтымақтастық орнату арқылы қол жеткізді.  Облыстық бал шаруашылығы қауымдастығы АҚ-ның төрағасы Олег Гаврилов мәлімдегендей   Дубайда ұйымдастырылған тамақ өнеркәсібі көрмесіне балдың 7 сұрпын ала барып, арабтар үлкен қызығушылық танытқан.  Екіжақты шарт рәсімделгеннен кейін жергілікті ара өсірушілер бірден іске кіріскен. «Қазақстанда бір кило бал 1500 теңге болса, ол жақта 7-8 мың теңгеге бағаланады.  Маусымда біздің облысқа БАӘ-нен делегация келіп, жаңа келісімдерге қол қоятын боламыз», дейді О. Гаврилов. Қазір ассоциация құрамында 200-ге жуық омарташы бар.  «Пассик Қызылжар» ЖШС-нің директоры Олег Гавриловтың өзі ғана жыл сайын кемі 10 тонна бал өнімін жинап, Қазақстаннан тысқары жерлерге өткізіп жүр.  Бал араларын Шымкенттен әкеліп, австриялық «карник» тұқыммен шағылыстырған. Нәтижесінде өнімділік молайып, сапасы да жақсара түскен. Бал өнімінің алғашқы партиясын маусым айында жөнелту жоспарланған. Өмір Есқали. Дерек, сурет: egemen.kz.