Ата Заң мерекесі Миланда аталып өтілді

Қазақстан Конституциясының күні ежелгі өркениет ордасы – Италия елінде аталып өтілді. Милан қаласында өтіп жатқан ЭКСПО-2015 Халықаралық жетістіктер көрмесіндегі Қазақстан павильонының алдындағы алаңда осы айтулы күнге арналған мерекелік шаралар болып өтті. Әлем халықтары жетіс­тік­те­рінің жәдігерлерін паш ететін ЭКСПО көрмесі – жаһандық ірі халықаралық шаралардың бірегейі. Міне, бірнеше айдан бері Милан қаласына дүние жүзінің назары ауған. Көрмеге төрткүл дүниенің төрт бұрышынан ат ізін салған туристердің Қазақ­стан Республикасы павильо­нына соқпай кеткендері кем де кем. Мамандардың айтуы бо­йынша, ЭКСПО-2015 Халық­аралық жетістіктер көрме­сін­дегі павильондардың ішінде қазақ­­стан­дық павильонның мерейі үстем болуда. Қазірдің өзінде еліміз­дің павильонына 600 мыңнан астам көрермен келген. Көрме аяқталғанға дейін олардың саны 1 миллионнан асып түсетіндігі кәміл. «ЭКСПО Бүкіләлемдік жетіс­тіктер көрмесі 120 жылдан астам уақыттан бері ең дамыған елдерде өткізіліп келеді. Қазақстан – жер көлемі жағынан әлемдегі тоғызыншы ел болып саналады. Біздің елімізде 140-қа жуық ұлт өкілдері тату-тәтті өмір сүруде. Қазақстан – Орталық Азиядағы және ТМД-дағы көшбасшы мемлекеттің бірі. Конституция – біздің еліміздің қол жеткізген жетістіктерінің тұғыры, тең құқық пен мүмкіндіктердің кепілі. Қазақстанның келесі ЭКСПО көрмесін өзінің астанасында өткізу құрметіне ие болуы да соның айқын айғағы», деді Миландағы Қазақстан Конституциясы күніне арналған мерекелік салтанатта сөйлеген сөзінде «Астана ЭКСПО-2017» ҰК» АҚ басқарма төрағасы Ахметжан Есімов. Бұдан кейін Ахметжан Есімов италиялық журналистердің қойған бірқатар сұрақтарына жауап берді. Олардың бірі Миланда өтіп жатқан көрмеде өзінің павильонымен көпшілікті таңдандырғандай, Қазақстан ЭКСПО-2017 Халық­аралық көрмесін жоғары дәрежеде өткізе ала ма деген сұрақ қойды. «Астанада өтетін көрменің тақы­рыбының өзі бүгінгі таңда әлемдегі ең маңызды мәселе болып отыр, оған қоса Қазақстан ЭКСПО көрмесін өткізудегі италиялық әріптестерінің тәжірибесін молынан пайдаланады», деп жауап берді «Астана ЭКСПО-2017» ҰК» АҚ басқарма төрағасы. Милан­дағы Қазақстан павильоны алдын­дағы мереке еліміздің өнер шебер­лерінің концертіне ұласты. Жарас САДУАҚАСОВ.