«Шахтердің» медиа-офицері он жылға сотталуы мүмкін

ҚАРАҒАНДЫ. 20 қазан. Қарағандылық прокурорлар «Шахтер» футбол клубында баспасөз қызметінің жетекшісі болып істеген Мансұр Қалиевті он жылға түрмеге қамауды талап етіп отыр. Бұл туралы egemen.kz тілшісі хабарлады. Еске салсақ, өткен жылдың қараша айында арнайы жедел жасақ жауынгерлері облыс орталығындағы «Олимп» букмекерлік кеңсесіне қарақшылық шабуыл жасаған бес бірдей күдіктіні қолға түсірген болатын. Кейін анықталғандай, бұл қылмыстық істің басты ұйымдастырушысы – «Шахтер» футбол клубының медиа-офицері Мансұр Қалиев болып шықты. Сондай-ақ, тергеу амалдары барысында Мансұр Қалиевтің бұдан бөлек қарақшылық шабуыл жасаудың тура осындай тағы да 8 фактісіне қатысы барлығы анықталған. Қазіргі уақытта осы іске қатысты сот процесі жүріп жатыр. Мемлекеттік айыптаушы Қалиевке 10 жыл, оның төрт сыбайласына 7 жылдан жаза сұрап отыр. Қайрат Әбілдинов. Дерек, сурет: egemen.kz.