Ақын Тұрсынай Оразбайқызы Шымкентке жерленді

АСТАНА. 25 мамыр. Өткен аптада Мәскеуде қазақтың көрнекті ақыны, сазгер Тұрсынай Оразбайқызы қайтыс болды. Сенбі күні қаламгер туған өңірі Оңтүстік Қазақстан облысына жерленді. Бұл туралы otyrar.kz хабарлады. Қоштасу рәсімі Шымкенттегі Шәмші Қалдаяқов атындағы филармония алдында өтті. Қаралы жиынға халық көп жиналды. «Қазақ тілі» газетінің редакторы Орынбасар Қуандықов: «Оңтүстікте 100-ден астам жазушы бар болса, біздер, Ресей қазақтары үшін Тұрсынай сияқтылар біреу ғана. Ол кісінің айтқан сөздерінен өнеге төгіліп тұратын. Мен үшін бүгін өте қайғылы күн», – деді. Тұрсынай Оразбайқызы 1950 жылы 19 ақпанда Оңтүстік Қазақстан облысы, Сайрам ауданы, Қайнарбұлақ ауылында туған. Қазақ мемлекеттік университетінің журналистика факультетін, Мәскеудегі жоғарғы әдебиет курсын бітірген. Жастайынын әнші әрі ақын ретінде көзге түсті. Облыстық драма театрында, «Оңтүстік Қазақстан» газетінде, қазақ радиосында, жазушылар одағында, Саха Республикасының Қазақстандағы өкілдігінде жұмыс істеген. Ұзақ жылдар Мәскеудегі халықаралық жазушылар одағы қауымдастығында қазақ әдебиеті бойынша кеңесші қызметін атқарды. Тұңғыш өлеңдер топтамасы «Жалын» баспасынан шыққан «Қанат қақты» атты жинақта жарық көрді (1975 ж.) «Таңғы шапағы», «Іңкәр жүрек әуені», «Гүлсезім», «Ты моя весна» сынды жыр жинақтары орыс, саха және тува тілдеріне аударылды. Халықаралық «Алаш» және А.Фадеев атындағы әдеби сыйлықтардың лауреаты. Саха-Якутия Республикасының еңбек сіңірген мәдениет қызметкері. Еламан Қоңыр. Дерек, сурет: otyrar.kz.