Үндістанда 4 күннің ішінде аптап ыстықтан 500 адам қайтыс болды

АЛМАТЫ. 25 мамыр. Аспан айналып жерге түскен ыстық пен ауа жетпес қапырықтан 4 күннің ішінде Үндістанда 500 адам көз жұмды. Қасіретті оқиға елдің оңтүстігіндегі Андхра-Прадеш пен Телангана штаттарында орын алды. Бұл туралы РИА «Новости» хабарлады. Мачилипатнам мен Туни шаһарларында ауаның темпреатурасы +47 градусқа дейін көтерілген. Ең қиыны – метеорологтар таяу күндері ыстықтың беті қайтпайтынын ескертті. Жергілікті әкімшілік тұрғындарға далаға шықпай, мүмкін болса көлеңкені саялауға кеңес беруде. Алайда, ең бастысы, халық – ауызсуға зәру. Сәуір мен мамыр айларында күннің ерекше ысуы Үндістанның оңтүстік аумағына тән құбылыс. Дегенмен  үнді синоптиктері Телаган штатында дәл мұндай ыстық соңғы рет 1947 жылы болған дейді. Сол жылы термометрдегі көрсеткіш Цельсий бағаны бойынша +47,2 градусты көрсеткен екен. Талғат Сүйінбай. Дерек, сурет: РИА «Новости».