Қостанай облысында 80 жастағы қария мұсылман дінін қабылдады

ҚОСТАНАЙ. 20 қазан. Қостанай облысының Ұзынкөл ауданындағы мешітте 80 жастағы Маргарита Жазитова қария мұсылман дінін қабылдады. Бұл туралы egemen.kz тілшісі хабарлады. Ұзынкөл адандық мешітінің имамы Есенгелді Әжмахан қажы: «Мешіт өміріндегі бұл  жаңалық Құрбан айт мерекесі қарсаңында болған еді. Әжейдің өзі басқа ауданда тұрады екен. Туыстары оны сәрсенбі күні алып келді. Шариғаттың шарты бойынша, ол кісінің құлағына азан шақырып, жаңа есім беріп, мұсылман дініне өткіздік. Құрбан Айт намазына келген жамағат қол жайғанда, әжеміз де қол жайып, «Аллаһу әкпар, Алладан биік ұлық жоқ», – деді. Қазір ислам қағидаттары туралы орыс тілінде де кітаптар, түсіндірме материалдар жеткілікті. Әжеміздің оқығаны, естігені көп екенін байқадым. Ислам дінінен хабары мол, үлкен дайындықпен келгені білініп тұрды. Имандылық туралы мешітіміз үздіксіз шаралар өткізеді. Соның өзінде  кейбір егде кісілер Айт, Жұма намаздарына келмейді, тіпті мешіттің есігінен қарамайтындар да бар. Әсел әжейдің таңдауы сондай кісілерге сабақ болса жарар еді», – деді. Әжей жаңа ныспысының Әсел Иванқызы болғанын қалапты. Ол  жолдасы Қайыржанмен бірге ұзақ жасады, екі ұл, бір қыз тәрбиеледі. Қазір немере, шөбере сүйген бақытты әже. Қайыржан атай осыдан оншақты жыл бұрын дүние салған боатын. Әжей өзінің туыстары мен балаларына «егер дәм-тұзым таусылып, олай-бұлай болып кетсем, шалымның қасына қойыңдар» деген өтініш-өсиетін де айтып қойыпты. Нәзира Жәрімбетова. Дерек, сурет: egemen.kz.