Ақпараттық-коммуникациялық технология: бүгін және ертең

Кеше Үкімет Үйінде Премьер-Министрдің орынбасары Бердібек Сапарбаев Халықаралық әлеуметтік қамсыздандыру қауымдастығы (ХӘҚҚ) президенті Эррол Франк Стуве бастаған делегациямен кездесу өткізді, деп хабарлады Премьер-Министрдің баспасөз қызметі. Кездесу барысында әлеу­меттік қамсыздандыру сала­сында ақпараттық және ком­муникациялық технологияларды (АКТ) пайдалану мәселелері талқыланды. Б.Сапарбаев Қазақстанда әлеуметтік саладағы АКТ дамы­туға ерекше көңіл бөлінетінін атап өтті. «Бұл саланы дамыту серпіні соңғы жылдары екпіндеп өсіп келеді. Жаңа технология­ларды енгізудің арқасында әлеуметтік саладағы электронды қызметтер саны жыл сайын артуда. Біздің еліміз АКТ дамыту деңгейі бойынша үлкен жетістіктерге жетіп, ТМД елдері арасында жетекші орындар­ға ие», – деп баса айтты Вице-премьер. Ол, сондай-ақ, Қазақстан дағдарыс кезінде де барлық әлеуметтік міндеттемелерді орындап отырған әлемдегі санау­лы елдердің бірі екенін айтты. Вице-премьер осыдан кейін Астанада 2-4 қыркүйекте ХӘҚҚ қамқорлығымен әлеуметтік қамсыздандырудағы ақпараттық және коммуникациялық технологиялар бойынша халық- аралық конференция өткізудің маңыздылығын атап өтті. «Осында ауқымды іс-шара халықаралық ынтымақтастықты әрі қарай жалғастыруға және тәжірибе алмасуға жағымды орта қалыптастырып, Қазақ­станның әлеуметтік қамсыз­дан­дыруындағы ақпараттық және коммуникациялық технология­ларды дамытуға жаңа серпін береді», – деп түйіндеді Бердібек Сапарбаев. Өз кезегінде Эррол Франк Стуве қазақстандық тарапқа конференция ұйымдастыруға қол ұшын бергені үшін алғыс білдіріп, аталған диалог алаңы әлеуметтік қамсыздандырудағы АКТ саласын одан әрі дамытуға сындарлы шешім жасауға септігін тигізетініне сенім білдірді.