«Мәңгілік Ел» концерті өтті

Кеше елордадағы Ұлттық музейде Астана күніне және музейдің 1 жылдығына орай «Мәңгілік Ел» атты концерт өтті. Мерекелік шарада Қазақстанның еңбек сіңірген әртісі, күйші-композитор Секен Тұрысбеков жетекшілік ететін «Ақ жауын» мемлекеттік камералық оркестрі мен «Серпер» күйшілер тобы өнер көрсетті. Ең әуелі музей кіреберісіндегі атриумда домбыра пати ұйым­дас­тырылды. Бұл шараға «Серпер» және «Көкбөрі» домбырашылар тобы қатысты. Екі топқа бөлініп күй тартыс жасаған жігіттердің өнер бәсекесі өте қызу және тартысты өтті. Домбыра патиді музей қонақтары мен қызметкерлері тамашалады. Аталған шарада күмбірлеген кербез-күйден шашу шашқан домбырашыларға көрермендер ерекше қошемет көрсетіп, жігерлендіріп отырды. Мерекелік шара барысында Ұлттық музейдің директоры Дархан Мыңбай сөз сөйлеп, өнерлі жастардың қадам­дарына сәттілік тілеп, алғыс айтты. Сон­дай-ақ, ұлтымыздың дәстүрлі өнеріне, соның ішінде домбыраға әрқа­шан да музей төрінен орын табылатындығын жеткізді. Бұдан кейін музейдің үлкен мәжіліс залында «Мәңгілік Ел» де­ген тақырыпта концерт болды. Кон­цертте бастан-аяқ «Ақ жау­ын» мемлекеттік камералық оркес­трі өнер көрсетті. Оркестр жетек­шісі – Қазақстанның еңбек сіңір­ген әртісі, күйші-композитор Се­кен Тұ­рыс­беков. Мұнда Секен Тұрысбековтің «Мәңгілік Ел», «Ақ жауын», Тәттім­беттің «Бестөре», Сейдолла Бәйте­ре­ков­тің «Кішкентай» күйлерімен қатар, тағы да басқа өнер туындылары орындалды. «Қазағымның жүрегінен жа­рал­ған, даламыздың үнісің сен, домбыра!», демекші, замана үнімен біте қай­насқан кербез күйші туындысы көрер­менін бір сәтте толқытып-тебі­ренте алды. Күй әлемін өзінше сөй­летіп, нәзік пернелер арқылы сыр­лы саз тудырып, әсем әуеннен сурет салған ерекше дарын иесіне бұл жо­лы да халқы риза болып, аямай қол соғып жатты. Өздеріңізге белгілі, талантты к­ом­­­­по­зитор С.Тұрысбеков «Мәңгілік Ел» күйі турасында баспасөзге берген бір сұхбатында: – Қай мемлекет болса да өзінің ұрпағы, отаны мәңгілік болғанын қалайды. Елбасының Жолдауда айтқан «Мәңгілік Ел» идеясы да осы күйдің жарыққа шығуына әсер етті. Мысалы, әншілер, күйшілер Елбасына арнап ән, күй шығарып жатса, теріс емес шығар. Бұл күй Елбасының ойына, идеясына қолдаушы болсам, бір жағына шыққың келіп, сүйеу болсам екен деген ізгі ниеттерден туындады. «Мәңгілік Ел» идеясы – алдағы болашақтан күткен үлкен үміт. Тәуелсіздігіміз баянды, елдігіміз мәңгі, қоғамымыз тыныш болса екен деген асыл арман, – дейді. Тағы бірде: «Елбасымен бір кездескенімде «Секен, өз оркестріңді құрсаң қайтеді?» деген идеяны берді. Содан мен Елбасының бұл ұсы­нысын мақұл көрдім. Сөйтіп, кейін «Ақжауын» оркестрі дүниеге келді десем, артық айтқандық емес. Ұжымыммен Астанаға көшіп келуі­ме тағы да Нұрсұлтан Әбішұлы себепкер болған еді», – деген болатын. Жиын соңында оркестр жетекшісі С.Тұрысбеков көрермендерді қала күнімен және Ұлттық музейдің 1 жылдығымен құттықтады. «Мәңгілік Ел» туындысының авторы елімізбен бірге өнеріміздің де мәңгілік болуына тілектестік білдірді. Раушан ТӘУІРХАНҚЫЗЫ, журналист.