Түркі дүниесінің жауһарлары Астанадағы музыка фестивалінде кеңінен насихатталды

Кеше елордадағы «Астана Опера» театрында «Астана-Арқау» дәстүрлі түркі музыкасы фестивалінің салтанатты жабылу рәсімі өтті. Қала күніне орай ұйымдастырылған мәдени шарада түркі халықтарының әуезді музыкасы мен саз өнері кеңінен насихатталды. Үш күнге созылған фестивальге отандық өнерпаздардан бөлек, Түркия, Өзбекстан, Қырғызстан, Түрікменстан, Әзербайжан, Моңғолия, Қытай елдері және Татарстан, Башқұртстан, Алтай, Хакасия, Саха, Тыва, Якутия, Таймыр, Қабардин-Балқар, Дағыстан (Ресей), Қарақалпақстан сынды түркі ұлттық автономияларының дәстүрлі әншілері мен ғалымдары қатысты. Бұл бастаманың мақсаты – түркі халықтарының байырғы және қазіргі этномузыкасындағы жақындықты іздеу, қос заманның сазынан өзара үйлесім мен үндестік табу. – Сол себепті аталған шара түркі халықтарының көп жанрлы му­зыкалық мұрасына арналды. Нақты айтсақ, фестиваль барысында түркі музыкасы жеке орындаушыдан бас­талып, эпикалық шығармалар сынды түрлі жанрда ұсынылды. Сондай-ақ, орындаушылардың шеберлігі арқа­сында көрермендер халықтың асыл қазынасымен танысып, сирек кезде­сетін музыкалық аспаптарды көруге мүмкіндік алды. Алдағы уақытта осы жұ­мыстардың қорытындысы ретінде «Астанадағы түркі әуені» атты бір­неше дискілі СD альбомын шығару жоспарланып отыр, – дейді ұйымдастырушылар. Шара аясында қатысушылар «Мыңжылдықтар тоғысындағы Астана» атты дәстүрлі көшпелілер өркениеті фестивалінде де өнер көрсетті. Ол жерде қала тұрғындары мен қонақтары түркі мәдениетінің құнды дүниесі мен ән өнерінің жауһарларына куә болды. Ал жабылу салтанатында халық Қырғызстанның «Ордо сахна» фольклорлық ансамблі мен Қабардин-Балқардың «Ийнер» өнер ұжымына ерекше қол соқты. Жеке орындаушылар арасынан қазақстандық Ерлан Рысқалидың әндері тыңдарманның айызын қандырып, рахатқа бөледі. Кеш соңында Рамазан Стамғазиев бастаған бір топ отандық өнер жұлдыздары «Дедім-ай-ау» әнін орындады. Бұл сәтті фестивальдің шарықтау шегі десек, артық айтқандық емес. Нақышына келтіре шырқалған әннен жиналған халық ерекше әсер алды. Мұндай фестиваль алғаш рет 2009 жылы ұйымдастырылғанын айта кетейік. Яғни, биыл жетінші рет өткі­зіліп отыр. Осы аралықта оған түркі халық­тарынан 470-тен астам музыкант пен сала мамандары қатысқан. Сонымен қатар, жыл өткен сайын аталған шараның аясы кеңейіп, қаты­сушылар саны артып келеді. Мәселен, биыл Ресейдің солтүстігін мекендейтін таймыр-долғандары Астанаға алғаш рет келіп, өнер көрсетті. Одан бөлек, биылғы фестивальдің тағы бір ерек­шелігі, Түрікменстаннан өте сирек кез­десетін аспаптардың жеткізілуі болды. Еламан ҚОҢЫР, «Егемен Қазақстан».