Алматыда 7 905 мектеп бітіруші соңғы қоңырауға қатысты

АЛМАТЫ. 25 мамыр. Алматыдағы мектептерде соңғы қоңырау соғылды. Қала бойынша осы жылы 7905 түлек мектеп бітіреді. Бұл туралы egemen.kz хабарлады. Қала әкімі Ахметжан Есімов №90 арнайы білім беретін мектеп-лицейде соңғы қоңырау салтанатына қатысты. Оқушылар алдында сөз сөйлеген қала басшысы: «Бүгінгі таңда мектеп бітіріп жатқан 7905 оқушының 6221-і ұлттық бірыңғай тестілеу сынына қатысады. Бұл биылғы мектеп бітіруші түлектердің 80 пайызы. Біздің қаламыздың талапкерлері аталған тест қорытындысына сәйкес үш жыл қатарынан көрсеткіштері бойынша тек қана алда келеді. Биыл да алғы шептен көрінеміз деген үміттемін»,–деді. Айта кетейік, бұл мектеп-лицей ұлттық бірыңғай тестілеуде он жылдан бері бірінші орында келеді. Талғат Сүйінбай. Дерек, сурет: egemen.kz.