Батыс Қазақстанда 2 адамды құлдықта ұстаған азаматқа үкім шықты

ОРАЛ. 25 мамыр. Батыс Қазақстан облысы Бөкей орда ауданындағы ірі меншік иесі 64 және 30 жастағы әкелі-балалы адамдарды 2 ай бойы құлдықта ұстаған. Осы іске қатысты өткен сот процесінде жәбірленушілер қожайынға қоятын кінәлары жоқ екенін айтқан. Өйткені ол құлдықта ұсталғандардың шығынын өтеген екен. Бұл туралы egemen.kz тілшісі хабарлады. Оқиға желісі былайша өрбіген. Қыстақтағы жан төзгісіз ауыр жағдайға шыдай алмаған 30 жастағы жігіт ол жерден қашып шығады. Алайда, оны меншік иесі тауып алып, қайтадан ауыр жұмысқа жегеді. Құлдықтағыларды ұйымдасқан қылмысқа қарсы күрес басқармасының қызметкерлері жүргізген операция кезінде құтқарудың сәті түсті. Сотта айыпталушы өзінің кінәсін толық мойнына алып, әрі өткен іске өкінетінін білдірді. Ал зәбір көрушілер қожайын өздеріне тиесілі ақшаны қайтарғандықтан оған шағымдары жоқ екенін мәлімдеді. Нәтижесінде судья «Бостандықтан еріксіз айыру» бабы бойынша, айыпталушыға шартты түрде бес жыл бостандығынан айыру жөнінде жаза тағайындады. Темір Құсайын. Дерек: egemen.kz. Сурет: zn.ua.