Дерек пен дәйек

32 200 000 000 Батыс Қазақстан облысында биылғы бірінші жартыжылдықта осыншама теңгенің құрылыс жұмыстары атқарылды, бұл өткен жылғыдан 23,2 пайызға артық. Облыстық статистика депар­та­ментінен түскен мәліметке қа­ра­ғанда, биылғы алты айда 638 жа­ңа ғимарат пайдалануға бе­ріл­се, соның 520-сы тұрғын үйлер. Бірінші жартыжылдықта тұр­ғын үй құрылысына 3,5 млрд. теңге жұмсалды. Жалпы көлемі 76,1 мың шаршы метр тұрғын үй беріліп, өткен жылғыдан 36,1 пай­ызға асып түсті. Жергілікті бюд­жет қаржысына 20,5 мың шар­шы метр, тұрғындар есебінен 55,6 мың шар­шы метр тұрғын үй бой көтерді. Сондай-ақ жыл басынан бері төрт денсаулық сақтау нысаны салынды. Темір ҚҰСАЙЫН, Орал. 79300, 152800 және 76800 Облыста өткен жылы, сәйкесінше, осынша адам театрларда, мұражайларда, демалыс бақтарында болды Көкшетауда қазақ және орыс драма театрлары бар. Шығар­ма­шылық ұжымдар көрерменге 499 қойылым ұсынды. Оның ішінде гастрольдік спектакльдер 15,6 пайызды құрайды. Жыл ішінде 21 жаңа қойылым көрсетіліп, оған 79300 көрермен қатысты. Бұл 2008 жылғыдан 14,3 пайызға көп. Облыста 13 мұражай жұмыс іс­тесе, соның төртеуі ауылдық жерде орналасқан. Келушілердің саны 152800 адамға жетті. Оның 86,8 мыңы балалар. Мұражайлар қоры 121,1 мың бірлікті құрайды. Тәрбие ошақтарында 3613 экс­кур­сия ұй­ым­дастырылып, 348 лекция оқылған. Көкшетаудағы демалыс бағы­ның аумағы 0,3 гектарға тең. Ста­тистикалық деректер бойынша, онда 76,8 мың адам өз дема­лы­сын өткізген. Мұның 84,6 пайы­зы балалар. Бақберген АМАЛБЕК, Ақмола облысы. 439 000 000 Биыл өлкедегі табиғат қорғау іс-шараларына осыншама қаржы бөлінді “Жер жәннаты – Жетісу” деп, әсем табиғаты ерекше әс­петтелген өлкенің мөлдір суы мен жасыл шалғынын, түгін тартса, майы шығатын жерін келешек ұрпаққа жеткізу парыз. Сондық­тан да табиғаттың осы әсемдігін бой­тұмар етумен қатар, эколо­гиялық мәселелерді халықтың өмір сүру деңгейіне қарай жақ­сар­туға көңіл бөлініп, еліміздегі 2007-2014 жылдарға арналған са­ланы тұрақты дамыту тұжырым­да­масына сәйкес өрістетілген жұмыс нәтижелі деуге болады. Қолданылған кешенді шара­лар барысында өлкенің эколо­гия­лық жағдайын қалпында сақтауға ықпал етіп, “Жасыл ел” облыс­тық штабы, студент-экологтар мен қоғамдық ұйымдар арасын­дағы байланыс нығая түскен. Сондай-ақ тиімді экологиялық таза техноло­гияларға көшу мен эмиссияны төмендетуге өткен жылы бюджет­тен 473 млн. теңге қаралып, ол толық игерілді. Биылғы жылы табиғат қорғау іс-шараларына 439 млн. теңге бө­лініп, саладағы түй­інді мәсе­ле­лерді қалпына келтіруге жұмса­ла­тын болды. Күмісжан БАЙЖАН, Алматы облысы.