Мақсат – қоғамдық сана қалыптастыру

Қазір елімізде Ата Заңымыздың 15 жылдығына орай әр түлі іс-шара­лар өкізіліп жатқаны белгілі. Сондай шараның бірі “Конституция – демо­кратия мен қоғамдық тұрақ­тылық негізі” тақырыбында “дөң­ге­лек үс­тел” сәрсенбі күні Астана­да­ғы Бейбіт­шілік және келісім са­райында өтті. Аталған шараны Қа­зақ­стан хал­қы Ассамблеясы, Ас­тана қаласының әкімдігі мен “Ка­зах­станская правда” газеті ұйым­дастырды. Дөңгелек үстел жұмысына Се­нат Тө­рағасының орынбасарлары Мұ­хам­­­бет Көпеев пен Александр Судьин, Ассамблеядан сайланған Пар­ламент Мәжілісінің депутат­тары, мемлекет­тік органдар, мемле­кет­тік емес ұйым­дар мен мәдени бірлестіктер бас­шылары қатысты. Шараны Қа­зақ­стан халқы Ассамб­леясы Төраға­сының орынбасары Ералы Тоғжанов жүргізіп отырды. Осы ретте шара аясында “Ка­зах­стан­ская правда” газеті бет­терінде жарық көрген материалдар негі­зінде әзірленген “Казахстан: тер­­ри­­тория мира и согласия” атты кі­тап­­тың тұсаукесер рәсімі өткенін айта кету керек. Кітап ел Консти­туция­сы мен Қазақстан халқы Ассамблея­сының мерейтой­ларына орайласты­ры­лыпты. “Ка­захс­танская правда” республикалық газеті” АҚ басқарма төрағасы Александр Тараков кітап­тың тек алғашқы 40 данасы ғана жедел жеткізілгендігін тілге тиек етсе, кітап бойынша өз пікірлерін Мәжіліс депу­таты Олег Дымов пен респуб­ликалық әдеби-көркем және қоғам­дық-саяси “Нива” жур­налының бас редакторы Владимир Гундарев ортаға салды. Алдымен сөз алған Ералы Тоғ­жанов Ата Заңның маңызына ерекше тоқталып өтті. “Конституция мемле­кет құрылуындағы қоғамның мұрат, мақсатын айқындайтын басты құжат. Ата Заңның басты мақсаты да ілгері мемлекет орнату, мемлекет ішін­дегі қарым-қатынас­тардың си­патын айшықтау”, деді ол. Өз кезе­гінде Мұ­хамбет Көпеев ойын былай өрбітті: “Біз бейбіт­шілік пен ынты­мақтың арқасында өткенімізді бағам­дап, алға үлкен мақсаттар қойып жүрміз. Осы­ның барлығы қазақстан­дықтар­дың тірлігі мен бірлігінің, Елбасымыз Н.Ә.Назарбаевтың сали­қалы сая­сатының арқасы деп есеп­теймін”. Сондай-ақ Еуропалық құ­қық және адам құқығы институты­ның дирек­торы Марат Башимов, “Нұр Отан” ХДП сараптамалық орталы­ғының директоры Қазбек Қазкенов сөз сөйледі. Жалпы, дөңге­лек үстелге қатысушылар этносара­лық және конфессияаралық төзімді­лік қазақ­стандық моделінің құқық­тық негіз­дері 1995 жылғы Конститу­цияда көрініс тапқанын атап көрсетті. Қорытындысында дөңгелек үс­телге қатысушылар елдің дамуын­дағы Президент – Ұлт Көшбас­шысы Н.Ә.Назарбаевтың ерекше рөлін атай келіп, қоғамдық санада Конституция күнін қоғамды ұйым­дас­тырушы ерекше маңызды шара деген түсінік қалыптастырып, аза­мат­тардың на­зарын мемлекеттілік пен тәуел­сіздік деген ең маңызды құндылық­тарға аудару қажеттілігін жан-жақты әңгіме өзегіне айнал­дырды. Асқар ТҰРАПБАЙҰЛЫ.