Мемлекет басшысы Нұрсұлтан Назарбаев Премьер-Министр Кәрім Мәсімовті, Ұлттық Банк төрағасы Григорий Марченконы және “Самұрық-Қазына” ұлттық әл-ауқат қоры” АҚ басқарма төрағасы Қайрат Келімбетовті қабылдады, деп хабарлады Қазақстан Республикасы Президентінің баспасөз қызметі.
Кездесу барысында Президент ағымдағы жылдың 31 тамызында Қаржы нарығы мен қаржы ұйымдарын реттеу және қадағалау жөніндегі агенттік басқармасында “БТА Банк” АҚ-ты қайта құрылымдау жоспары бекітілгені туралы хабардар болды.
Президент бәріне атқарылған жұмыстар үшін алғыс айтты және мемлекет дұрыс стратегияның нәтижесінде еліміздің банк жүйесін тұрақтандырғанын атап өтті, ол бүгінде қалыпты режімде жұмыс істеуде.
Журналистерге арналған брифингте Ұлттық Банк төрағасы Григорий Марченко бұдан бұрын, ағымдағы жылдың 1 сәуіріндегі жағдай бойынша – “Альянс-банктің”, ал ағымдағы жылдың 1 шілдесіндегі жағдай бойынша “Темірбанктің” қарыздарын қайта құрылымдау аяқталғанын атап өтті.
Осылайша, барлық үш банк өткен жылы көктемде бастаған қайта құрылымдау үдерісін табысты аяқтады. Жалпы жиынтығында 11 миллиард долларға жуық қарыз есептен шығарылды. Қарыздың қалған бөлігі қайта құрылымдалды – ішінара облигацияға, ішінара осы банктер акциясына конверсияланды. Аталған үш банктің сыртқы кредиторларына сындарлы ұстанымдары үшін алғыс айтуымыз керек. Ең бастысы, тұтастай алғанда сыртқы қарыз мәселесі реттелді, – деді Г.Марченко.