Сотталғандар жақындарымен бейнебайланысқа шықты

Кеше Әділет министрлігі Қылмыстық-атқару жүйесі комитетінде отандық пенитенциарлық жүйе тарихында алғашқы рет сотталғандардың қашықта тұратын туыстарымен он-лайн бейнережіміндегі кездесуі болып өтті. Қанатқақты жобаны алғашқылардың бірі болып сотталғандардың Астана, Алматы, Ақтөбе, Семей қалаларында тұратын туыстары пайдаланды. Тар қапасқа қамалғандар сырт­қы дүниемен ақпараттық байла­ныс­та, сондай-ақ өз туған-туыс­та­рымен аралас-құралас болуға аса мұқ­таж. Ал мұндай жаңа мүмкіндік оларға моральдық және психо­ло­гиялық тұрғыда қолдау болатыны ан­ық. Жаңа әдістің тағы бір пай­да­лылығы еліміздің бір түкпірінде жазасын өтеп жатқан сотталушы­ның екінші бір облыста тұратын ту­ыстарымен жол жүру шығын­да­рын­сыз-ақ қысқа уақыт ара­лы­ғын­да көзбе-көз жүздесе алатындығы бо­лып отыр. Туысқандарының ма­те­риалдық мүмкіндіктері жоқты­ғын, сондай-ақ ауа райының әр­дайым жол жүруге қолайлы бола бер­мейтінін ескерсек, сот­тал­ған­дарға кездесуге келетін жақын ту­ыс­қандарының санына шек қой­ыл­мауына қосымша мүмкіндік береді. Бейнекездесу түзеу мекемесінің ішкі тәртіп ережелерін бұзбай, жақ­сы тәртіптерімен, сонымен қатар еңбекке деген адал көз­қа­растары және мәдени іс-шараларға белсене қатысуынан тұратын ме­кеменің ұсталу режімін бұлжытпай сақта­ған­­дарға ұсынылатын болады. Ба­лалардың бейнережім арқылы бас бостандығынан айыру орган­дарына бармай-ақ, ата-аналарымен араласа алуы және оларды көре алуы әдіс­тің тиімділігін көрсетеді. Бұл ретте түрменің кейіп-кескіні ба­лалардың психологиясына бұ­рын­ғыдай жа­ғым­сыз әсерін ти­гіз­бейді. Бейне­бай­ланыс келесі жыл­дан бастап Қа­зақстанның барлық түрмелеріне ен­гізілетін болады. Ал сотталушының туыстары өз тарап­тарынан жазасын өте­у барысы дұ­рыс жүріп жат­қан­дығына шынайы көз жеткізеді. ҚАЖК басшылығының айтуын­ша, жақын арада ел колония­ла­рының барлығын бейнебайланыс құралдарымен жарақтандыру жос­пар­лануда. Шараның сотталушы­лар­ды ізгілендіруде үлкен рөл атқа­ра­тыны даусыз. Бұл жазасын өтеу­шіге ғана емес, олардың тума-ту­ысқандарына қатысты да ізгіліктің көрінісі болып табылмақ. Мұндай бастама жазасын өтеушілерге игі ақпал етіп, кейінгі өмірінде қисық жолға қайталап түспеуіне себін тигізеді деген үміт мол. Венера ТҮГЕЛБАЙ.