Назарбаев университетінде оқу жылы басталды

Назарбаев университеті өзінің жаңа оқу жылын салтанатты түрде бас­тады. 500  студентке арналған оқу жы­лының алғашқы күнінен бастап ағыл­шын тілі мен бейімдік пәндердің теориясы бойынша сабақтар жүр­гізілді. Еліміз бойынша оқу үрдісі тек қана ағылшын тілінде жүретін жо­ғары оқу орындарының бірі әрі біре­гейі болып саналатын аталмыш уни­верситетке АҚШ-тан, Ұлыбритания­дан, Жаңа Зеландиядан, Канададан 55 педагог таңдап алынған болса, олардың бәрі қазірдің өзінде Аста­на­ға келіп, оқытушыларға арналған “бағдарлаушы аптадан” өтіп үлгерген көрінеді. Осыған дейін мәлім болғандай, 22 қыркүйек күні Назарбаев уни­вер­си­тетінің студенттеріне арналған “бағ­дарлаушы апта” өткізілген болатын. Сабақ басталғаннан бері бірнеше күн ішінде студенттер тіркеуден өтіп, жатақ­ханаға орналасты. Оқулықтарын алып, оқытушылармен танысты. Бағ­дарлаушы апта кезінде ата-аналардың сұрақтарына оқытушылар да, уни­верситеттің басшылығы да тұшымды жауаптар қайтарды. Студенттерге Foundatіon бағдар­ла­масын соңғы әлемдік рейтинг бой­ынша төртінші орынды иемденген Unіversіty College London оқу орны ұсынғаны белгілі. Осыған байланыс­ты университеттің академиялық күн­тізбеден бастап, өтілетін бағдарлама­сының толық жүйесі соған сай бола­ды. Сол себепті де, бірінші курсқа түскен студенттер лекцияны қалай дұ­рыс тыңдау керектігін, негізгі сөз­дерді дәл танып, белгілеп алу қа­жеттігін үйренеді. Назарбаев университеті оқу жы­лының басталуына орай өткен сал­танатқа Халықаралық консультация­лық кеңестің мүшелері, сондай-ақ аталмыш білім ордасымен әріптес жоғары оқу орындарының шетелдік про­фессорлары қатысты.  Оқу орны басшылары мен оқытушылар сту­дент­терді жаңа оқу жылымен құттық­тай келе, студенттердің университет­тегі негізгі міндеттерін, жауапкерші­ліктерін айқындап берді. Арай ҮЙРЕНІШБЕКҚЫЗЫ.