Приднестровье бойынша келіссөздер

ЕҚЫҰ Іс басындағы төрағасының созылмалы жанжалдарды реттеу жөніндегі арнаулы өкілі елші Болат Нұрғалиев Приднестровье жанжалын реттеу бойынша “5+2” тұрғысындағы үдерістің жалғасуын құптап, ресми келіссөздерді қайтадан бастауға шақырды. ЕҚЫҰ-ның Венадағы хатшы­лы­ғында “5+2” тұрғысындағы екі күндік бейресми кездесу аяқталды, оған Молдова Республикасы мен Приднестровье тараптары, сондай-ақ Ресей Федерациясы, Украина, Америка Құрама Штаттары, Еуропа Одағы және ЕҚЫҰ секілді ара­ағайын және бақылаушы елдер мен ұйымдардың өкілдері қатысты. “Келіссөздер үдерісіне қатысты қозғалыс еркіндігі мен кепілдіктер жүйесі – “5+2” тұрғысындағы кез­де­судің негізгі екі тақырыбы осы­лар, – деп мәлімдеді елші Нұрға­лиев. – Біз осы кездесу барысында елеулі ілгерілеушілікке қол жеткіздік. Екі саладағы да прогресс Днес­трдің екі жағалауындағы қара­пайым адамдардың тұрмысын жақ­сартуға, сондай-ақ тараптар ара­сын­дағы сенімді нығайтуға сеп­те­седі, мұның өзі жанжалды саяси реттеу үшін қажет”. Бұл биылғы жылда “5+2” тұр­ғысында өткізіліп отырған төртінші кездесу. Жыл басынан бері келіс­сөздер үдерісі бұрынғыға қарағанда әлдеқайда реттеуге болатындай, әл­деқайда интенсивті және әлдеқайда жемісті тұрғыда өтіп жатыр. Бұл “5+2” үдерісіне қатысты алға қой­ған мақсатқа жететініміз жөнінде сенімділік білдіруге мүмкіндік береді. Ал мұндай мақсат – ресми келіссөздерді жалғастыру биылғы жылдың алғашқы кездесуінде келісілген болатын. Төртінші кездесуді өткізгенге дейін біз өңірлерде болып, екі та­раптың да Бірлескен сараптамалық жұмыс топтарының жетекшілері­мен кездестік, – дейді Қазақстан дип­ломаты. – “5+2” тұрғысындағы кез­десуде біз бұл топтардың тиім­ділігін жедел арттыру тетіктерін талқыладық. Келіссөздерге қатысушылар қа­зіргі саяси оқиғалар мен Мол­дова­дағы, сол секілді Приднес­тровье­дегі сайлаулар келіссөздер қыз­метінде үзіліс туғызбауға тиіс деген уағда­ластыққа қол жеткізді. Елші Нұр­ғалиев тараптар бұдан кейінгі қа­дамдар, соның ішінде қараша айы­ның ортасында бола­тын келіс­сөздердің келесі кезеңін өткізу ту­ралы уағдаласқанын атап өтті. Талғат ЖҰМАҒҰЛОВ, “Егемен Қазақстан” – Венадан.