20 Қазан, 2010

Битумды біз де шығарамыз

322 рет көрсетілді
Қазір ғой, Оңтүстіктің асфальт жол салуға машықтанып алғаны. Бүгінде екі асфальт зауы­ты бар “Береке А” компаниясының бас ди­ректоры Рәшкүл Оспанәлиева­ның жұмыс­шы­лары тоқсаныншы жылдары шағын бір алаңқайға асфальт төсейді. “Асфальт деген күн өткен соң қатар еді, біздікі күнде бассаң түк­ті кілемдей был­қыл­дайды да жатады. Сөйт­сек, битумы нашар екен”, дейді облыс­тық мәс­лихаттың депутаты, белгілі кәсіпкер бүгіндері күліп. Оңтүстіктің жігіттері, жүдә, пы­сық қой. Сондықтан да оларды “тәш­кен көрген” деп жатады. “Ба­тыс Еуропа – Батыс Қытай” автомагистралі салынатындығы жө­нінде сыбыс шыққанда іскер жігіттер битумға өте зәрулік бо­ла­тындығын біліп, тәуекелдің қайығына мінген. Бүгінде “Битум” ЖШС Төле би ауда­нын­дағы ең серпінді жобалар­дың бірі. “Жылан­бұзған” елді мекенінің батыс жақ беткейін бетке ал­саң көкке ұмсынған, самсап тұр­ған зымыран пішіндес қондыр­ғы­лар­ды көресің. Бұл – көзіңіз ал­да­ғандай, ғарыш айлағы емес, битум зауыты. 2007 жылы бастаған кәсіп­орын 2010 жылдың мамыр айында пайдалануға бе­рілген. Жылына 6 мың тонна битум дайын­дайды. Біз барғанда зауыт Ресейден шикізат күтіп тоқтап тұр екен. Учаске бастығы Талғат Шәң­кі­баев­тан шикізатты Қазақстанның ішінен іздеп көруге неге бол­май­тындығын сұрағанбыз. Іздесті­ріп­ті. Бірақ, сапасы айтарлықтай емес. Сон­дық­тан, керекті гудрон шикі­заты Ресейден тасы­мал­данады. Көп партияға тапсырыс берілген. Ол қондырғылардың астындағы алып қазан­дықтарға құйылып алынады да, май шайқа­ған­дай сапырып, қа­жетті температураға дейін көтереді. Жаңа қондырғылармен жабдық­тал­ған зауыттың артықшылығы, бір мезетте би­тумның 5 түрлі маркасын айырып шығара­тын­дығында. Білмеген нәрсеңнің құпиясына қаныққың келеді. Битумға неге бес түрлі марка керек? Талғат түсіндіреді. Табиғаттың мезгілдеріне қарай жаз бен күзге лайықты битумдар ыстық және салқын болып бөлінеді. Жер жағдайына қарай түрлі маркаларға сұраныс түсіп жатады. – Біз үш кезекте 100 адамды жұмысқа алдық. Бірақ, бұл жеткіліксіз екен. Төртінші ке­зекке операторлар алуды ойластырып жа­тыр­мыз, – дейді учаске бастығы. – Өйткені, операторлар шаршаса аппараттағы қалыпты темпера­ту­ра­ны жоғалтып алады да, бір мар­ка­ның орнына екіншісі шығып кетеді. Қарапайым жұмысшының опе­ратор болып, кнопкамен басқары­ла­тын аппаратпен жұмыс істеуі қиын. Бұған сауатты мамандар ке­рек. Зауытқа керекті мамандар М.Әуезов атындағы Оңтүстік Қа­зақстан Мемлекеттік универси­тетінің базасында дайындалады. Зауыттың өніміне сұраныс көп. Қызылордада “Батыс Еуропа-Батыс Қытай” автомагистра­лін салуға қатысып жатқан италиялық фирма көп көлемге тапсырыс берген. Кезекте тұрғандар жетеді. – Үш жүз миллион теңгеге са­лынған би­тум зауыты жаз мау­сы­мында екі жүзге дейін жұмысшы қа­былдай алады, – дейді Төле би ауданының әкімі Әуелхан Тұр­ғым­беков. – Облыстың ішінде битум шы­ғаратын шағын зауыттар бол­ға­нымен мұнымен шендесері жоқ. Қазақстанның келешегі осындай іргелі өндіріс орындарының көпті­гін­де. Бұрын асфальт жолы үшін битум іздеп кәсіпкерлер Ресейге дей­ін сабылатын еді. Қазір өз жігіт­теріміз осы олқылықтардың орнын толтырды. Сол үшін оларға рахмет. ...Қырға шықсаңыз көкке ұмсынған зымыран пішіндес қондырғыларды көресіз. Бұлар зымырандар емес, өзіміздің іскер жігіттердің замана ыңғайын байқап іске қосқан алып кәсіпорны. Битум өндірісінің алғашқы қарлығашы. Бақтияр ТАЙЖАН, Оңтүстік Қазақстан облысы. Суреттерді түсірген автор.
Соңғы жаңалықтар

Қилы-қилы тағдырлар

Тарих • Бүгін, 19:30

Тозақтан өтсе де түңілмеген

Руханият • Бүгін, 18:00

Радист қазақ қыздары

Тарих • Бүгін, 17:10

Қарсы барлаушылар қаһармандығы

Руханият • Бүгін, 15:50

Ескерусіз кеткен есіл ер

Таным • Бүгін, 12:50

Майдангердің өнегелі жолы

Руханият • Бүгін, 10:55

Ржев шайқасының қаһарманы

Тарих • Бүгін, 10:30

Тұрлауы қиын тағдырлар

Тарих • Бүгін, 09:30

Ардагерлер азайып бара жатыр...

Қазақстан • 07 Мамыр, 2021

Ұқсас жаңалықтар