Алтынсарин оқулары

Жаһандану жағдайындағы ұлттық білімге арналды Өнер-білімі дамыған жұрттардың қа­тарына ұлтын қосуды арман еткен Ыбырай Алтынсариннің бала оқыту жөніндегі озық идеясын жаңғырта алсақ, көп құндылықтар бар. Ұлы ағартушы бір замандары “Алыстан хабар алғызған” деп айтқан сөзі бүгін жүзеге асып, алысты қойып, ғарышпен тілдесіп жатыр­мыз. Бұдан бабамыздың ой-санасы­ның сол заманның өзінде өлшеусіз биік болғанын, тіпті көріпкелдік танытқанын аңғару қиын болмаса керек. Үш жылдан бері халықаралық деңгейде өтіп келе жатқан Ыбы­рай Алтын­сарин оқулары биыл елор­дада “Жаһандану жағдайында ұлттық білім беру жүйесін дамыту” деген тақырыпта жалғасын тапты. Ұлтымыздың ұлы ағартушысы, жаңа­шыл-педагогы, қазақ мектебінің және ұлт­тық білім беру жүйесінің негізін қалаушы, ғалым-этнограф, ақын, прозашы Ыбырай Алтынсариннің бүкіл еңбектерін халық­аралық оқу үрдісімен салыстыра отырып, жаһандану заманындағы ұлттық білім туралы ғылыми жаңалықтарды оқытудағы жаңашылдық шекара таңдамайтынын, ол өркениет дамуында ортақ үрдіс болып саналатынын ғұлама атындағы Ұлттық білім беру академиясының президенті Т.Балық­баев баян етсе, Беларусь Республикасы ұлттық білім беру институтының директоры Г.Пальчик өз отанындағы білім берудегі ізденістерді тілге тиек етті. Ал Украинадан келген ғалым О.Лященко орта білімді реформалаудағы Қазақстан үлгісін сөз етті. Алқалы басқосуда ұлы ұстаздың жан-жақты ой-байламдарын бүгінгі заман үрдісімен ұштастыра отырып, оқу үрдісіне орнықтыру жайы қозғалды. Сонымен қатар, халық­аралық конференцияға қатысушылар ұлттық білім беру жүйесін жаһандану үдерісіне сәйкес жетілдіру, инновациялық ізденістерге оң ықпал ету, 12 жылдық білім беруге көшу­дің ғылыми-әдіснамалық және оқу-әдіс­темелік негіздерін қалыптастыру, халық­аралық және ТМД елдері ғылыми ұйым­дары­мен қарым-қатынасты нығайту жайын сөз етіп, ортақ мақсатқа бірлікте болу қажеттігін алға тартты. Сүлеймен МӘМЕТ.