“Жастар” спорт сарайы

Сәулетті ғимарат саламатты өмір салтын қалыптастыру орталығына айналды Табиғаты тамаша өлкеде күн сайын тиянағы келтірілген игі іс­тер көңіл көтеріп, алдағы күн­дерге деген ынта-ықыласты төгілдіре түсуде. Осы лектегі жайдарман жаңалық сол, ол – шаһарға кірер тұс­тағы төбесі ұлт киесі шаңы­рақпен көмкерілген, айналасы ат­шаптырым спорт сарайы мен оның алдындағы Жетісу ақын­дарының алтын діңгегі Сүйінбай Аронұлы ескерткішінің ашылуы­мен жалғасты. Мұның өзі Мем­лекет басшысы Нұрсұлтан Назар­баевтың биылғы халыққа арнаған Жолдауындағы саламатты өмір салты мен адамның өз денсаулығы үшін ынтымақты жауапкершілігін қалыптастыру, нысандар салу және жабдықтау жөніндегі тап­сыр­маның жүзеге асырылуының дәлелі. Айналасы абаттанды­ры­лып, іші кірсе шыққысыз сарай­дың алдындағы жыр сүлейі ес­керткішінің биіктігі 10 метр болса, оны сомдауға 52 млн.теңге жұмсалған. Жақсы десе жандары жады­рай­тын жұртшылық ақын ескерт­кіші мен “Жастар” спорт сарайы­ның ашылуында Бикен Римова атындағы облыстық драма театр әріптестерінің арнайы қойылы­мын тамашалап, арқалы ақын Сүйінбайды қарсы алды. Қырғыз­дың ақыны Қатағанмен айтысын өнерсүйер қауым назарына ұсын­ған әнші-термеші Ерболат Шалдыбеков ­– жас Сүйінбай, ал Қатағанның бейнесін халықара­лық Жамбыл, “Жас дарын” сый­лықтарының иегері, жыршы-жырау Ақан Әбдуәлиев сомдап, асыл мұраны қаз қалпында тартымды бейнеледі. – Мен тұрмын қолды-аяққа тұрғым келмей, Аузымнан будақ-будақ шыққан сөзді, Не дейін әулие-сөз өлең демей!, – деп ақын өзі жыр­лаған­дай, Ерболаттың орындауындағы көкке өрлеген асыл теңеу шабыт­қа ша­быт қосып, туған халқын бөліп-жармай, оларды мақтан етіп, қыр­ғыздың адуынды ақыны Қатаған­ды тізе бүктірген тұсында “Бәре­кел­ді!”, “Сөз құдіреті деген осы”, – деп көрермен қошамет таны­тып, рухтанды. Асылы, дуалы ауыздан шыққан аталы сөздің дуанды елді ұйытатынына осы күні тағы бір көз жетті. Туған елінің кешегісі мен ке­мел келешегін алтын арнаға то­ғыс­­тырған жыр сүлейінің айтысын жетісулықтар ерекше желпініспен тамашалап, бірлік пен ынтымақ­тың қазанында қайнады. Бұдан кейін ақынға қойылған тұғырлы ескерткіштің ашылуында облыс әкімі Серік Үмбетов сөй­леді. Туған өлке, қасиетті тал бесік – Отаның кіндік қаның тамып, кір жуған жерден басталады. Демек, оған қызмет етіп, еңбек сіңіру керектігін, бабалар рухын басты парыз санауға тиістігін әр адам жүрек түкпірінде аялайтыны анық. Қазақ халқы дарынды ақы­ны, қол бастаған батырларымен белгілі. Бүгінгі егемен, тәуелсіз ел болуымыздың негізі сол абыз, баһадүр бабалардың қайсарлығы мен бірлігі нәтижесінде қалан­ғанын өскелең ұрпақ білуі тиіс. Шаһар келбетін арқалы ақыны мен баһадүр бабалардың асыл тұл­ғалары айшықтап, өткен тари­хымыздан сыр шертсе, мұның өзі алтын көпір тарихымызға, елге, жерге деген құрмет. Бүгін еңселі ес­керткіштің бой көтеруіне ат­са­лыс­қан азаматтарға алғыс айта­мыз, деді. Ескерткіштің айналасы абат­тан­дырылса, жаңа аллеяға арда­гер­лер бастап, ағаш көшеттерін отырғызды. Көптен күткен спорт сарайының лентасы қиылып, халық ондағы жасалған жағдай­ларды тамашалады. Еліміздегі бірегей спорт кешенінің аумағы 24 500 шаршы метр. Бір мезгілде 1500 көрерменге арналған әмбебап зал, спорттың әр түрімен айна­лысуға болатын жаттығу залдары, фитнес, баспасөз орталығы, қонақ үй, тағы басқа халыққа қызмет көрсететін орындардың жабдық­талуы да көңіл қуантады. Салтанатта Атланта Олимпиа­дасының қола жүлдегері Мәулен Мамыров осы жерден әлі талай жастар шыңдалып, елімізді, Жеті­су өңірін қуантатын жеңістерге қол жеткізеді, деді. Теңдесі жоқ спорт сарайы құрылысының бой кө­теруіне орай Мемлекет басшы­сы­на, облыс әкіміне жастар аты­нан ризашылығын білдірсе, “Спорт әлемі” әнінің ырғағымен бұ­­қара­лық спортты еншілеген көр­кем гимнастшылар мен жас акробат­шылар, бірыңғай киінген каратэ­ші­лер, балғын футболшы­лар мен волейболшылар жаттығу­лар ­көр­­сетіп, мың бұрала биледі. Мю­зикл соңынан “Құлансаз” ансамблі көпшілікке өз өнерлерін тарту етті. Осы күні алғашқы жарыс мем­лекеттік қызметшілердің дәстүрлі спартакиадасы жалғасын тауып, саламатты өмір салтын қалыптас­тырудың нақты көрінісі орнықты. Спартакиада барысында прези­дент­тік көпсайыс, волейбол, тоғыз­құмалақ, шахмат, бильярд, теннис пен кіші футбол бойынша мемлекеттік қызметкерлер өзара бәсекеге түсіп, шымырлықтары мен ептіліктерін өрнектеді. Күмісжан БАЙЖАН. Алматы облысы. ______________ Суретте: спорт сарайының жалпы көрінісі.