Өркенді істер өрісі

Мемлекет басшысының биылғы Жол­дау­ын­да жергілікті әкімдерге индустриялық бағыт ар­қылы экономиканы өркендету мен отандық өндірісті дамыту міндеті тапсырылған болатын. Осы орайда Жетісу жерінде бірқатар өркенді істер қанат жайды. Сол атқарылған жұмыс­тар­мен танысу үшін облыс әкімі Серік Үмбетов Қапшағай өңіріндегі металл құрылғылар шығаратын зауытта болды. Осыдан төрт жыл бұрын Заречный ауылы­ның оңтүстік-батысындағы ашық алаңда ша­ңы­рақ көтерген күрделі кәсіпорынның иесі, “ІLNO Group” ЖШС директоры Нөгер Тойшыбаев құрылысқа қажетті  алғышарттарды жүзеге асырған еді. Бұрын іске қосылған және келесі жылы қаңтар айында құрылысы толық аяқталатын жаңа нысанды аралаған облыс басшысы мұндағы қарқынды жұмыстармен жан-жақты танысты. Кәсіпорынның аумағы 4,6 гектар жерді алып жатыр. Осыған қарағанда алдағы күндерге деген мақсат-мүдделері де айқын екені аңға­ры­лады. Өйткені құрылыс материалдарын өн­діретін кәсіпорынның қазірде Қазақстанда баламасы жоқ. Жаңа зауыттың бірінші бөлігі 2007 жылдан бері өнім шығарып, өңірдегі құ­ры­лыс нысандарының тапсырыстарын тия­нақты орындап келеді. Жолдауға байланысты алдарына басты мақ­сат қойған кәсіпорын ұжымы  арада үш жыл өткенде зауыттың іргесін кеңейтуге ұмтылыс танытыпты. Кәсіпорынның солтүстігінде ме­талл құрылғылар құрастырылып, алдағы қаңтар айында іске қосылатын екінші бөлігіндегі жұ­мыс­тың соңғы жиынтығы аяқталуға жақындапты. Зауыт директоры күрделі жабдық, қон­дыр­ғылар Қытайдан әкелінгенін атап өтті. Мұн­дағы металл шикізаттары Қарағандыдан, Ресей­дің Магнитогор зауытынан жеткізілетін көрі­неді. Одан өндірістік, азаматтық және тұрғын үй құрылысына қажетті өнімдер жасалады. Зауыт өніміне деген сұраныс жоғары.  Соны­мен қатар  құрылыс индустриясын дамытуды алға қойған кәсіпорын өнімдерінің 30 пайызын Ресейге, Қытайға, Орталық Азия мемлекет­терін­дегі тұтынушыларға ұсынып отыр. Жоғары экспорттық әлеуеті бар, инно­вациялық жоба бойынша жаңа технологияға сай шығарылған өнімдердің сапасы да жоғары. Жобаны Қазақстанның даму банкі қар­жы­ландырыпты. Дегенмен, мұнда да шешімін күткен мәселелер баршылық. Өйткені өндіріс құрылысын толық аяқтау үшін соңғы транш бойынша қажетті қаражат алуда қиындықтар кез­дескен. Егер осы түйін ойдағыдай шешілсе, екінші зауыт алдағы каңтар айында іске қосылады. Бір айта кетерлігі, мұндағы жұмысшылар Қапшағай қаласы мен жақын ауыл тұрғындары. Бүгінде кәсіпорында 100-ге жуық адам істесе, екінші зауыт іске қосылғанда 200-ге жуық жер­гілікті халық тұрақты жұмыспен қамтылмақшы. Кәсіпорын кадрларды тұрақтандыру мақсатымен темір дәнекерлеуші, құрастырушы, слесарьларды да өздері оқытып дайындайды. Аталған жобаның маңыздылығына байла­нысты мұнда 2 жылдан кейін шыққан шығын толық өтеледі. Зауыт жылына 100 мың тонна металл құрылғылар шығарып, өндіріс көлемін 20 млрд. теңгеге жетізуді жоспарлап отыр. Жұ­мысшылардың айлық еңбекақысы 80 мың теңге көлемінде. Бұдан кейін облыс басшысы Заречный ауылынан сәл төмен орналасқан қыратты тегістеп, жылыжай салып жатқан “Грин Ленд Алатау” серіктестігіне атбасын бұрды. Мұнда жы­лы­жай басшысы Алмас Даутов 5 гектар жер­ге голландиялық тәсілмен түрлі көкөніс да­қыл­дарын өсіруді мақсат етіп, жұмысын бастап ке­тіп­ті. Олар алдағы жылы тұтынушыға эколо­гиялық жағынан таза көкөніс түрлерін көптеп ұсынбақшы. Осылайша Алматы қаласының айналасында азық-түлік белдеуін қалыптастыру мәселесі біршама шешілетін болады. Жолдауда “Балапан” бағдарламасына бай­ла­нысты да тапсырылған міндеттер ауқымы сан-салалы. Бұл орайда Қапшағай қаласындағы “Балдәурен” балабақшасын күрделі жөндеуге бюджеттен биыл 64 млн. теңге бөлініп, 150 бала тәрбиешілердің аялы алақанында күн санап көркейе түскен. Серік Әбікенұлы әр бүлдір­шінге аталық мейірімін төгіп, есімін сұрап, маңдайынан сипап, әр бөлмені аралады. Бала­бақша меңгерушісі Гүлзада Ақынбекова Мемлекет басшысының қолдауы нәтижесінде іске асқан іргелі жұмыстарға тоқталып, өмірімізге лайықты өрендер өсірудегі ұжымның алға қойған мақсатын талдай жеткізді. Елбасының ойынханаларды Алматы қаласынан тыс аймаққа көшіру тапсырмасына орай  жүзеге асырылған жұмыстар барысында Қапшағай қаласында да оннан астам ойынханалар бой көтерген. Облыс басшысы қаладағы “Принц” ойынханасына аялдады. Одан соңғы жұмыс сапары Шеңгелді селолық округіндегі “Ақбота” балалар бақшасы мен мәдениет үйінде жалғасты. Күмісжан БАЙЖАН. Алматы облысы.