Қос тарапты мүдделестік көрінісі

Кеше Ақордада Елбасы Нұрсұлтан Назарбаев Қазақстан Республикасына елшілік қызметке жаңадан тағайындалған Сауд Арабиясы Корольдігінің, Жапонияның, Иордания Хашимиттік Корольдігінің, Литва Республикасының, Венгрия Республикасының Төтенше және өкілетті елшілері Абдулмажид Хакимнен, Юдзо Харададан, Сүлейман Абдельфатах Сүлейман Арабиаттан, Рокас Бернотастан және Имре Ласлоцкиден Сенім грамоталарын қабылдады. Грамоталарды қабылдау рәсімі кезінде Президент Н.Назарбаев олардың өз міндеттеріне ЕҚЫҰ-ның Астанадағы Саммиті қарса­ңын­да кіріскелі тұрғандарын атап өтті. Мұндай аса маңызды форум­ның Астанада өткізілгелі отырған­дығының өзі – Қазақстанның Ұйым төрағасы ретінде атқарған жұмысына берілген үлкен баға. Саммитке Азия, Еуропа және Америка құрлықтарынан 56 елдің мемлекет және үкімет басшылары, сондай-ақ көптеген халықаралық ұйымдардың  жетекшілері қаты­са­ды. Ал келесі жылы Қазақстан Ис­лам Конференциясы Ұйымына төр­ағалық етеді. Міне, халық­ара­лық аренадағы Қазақстанның осындай белсенді қызметтері ке­зінде біздің еліміздегі сіздердің қызметтеріңіздің де белсендірек бол­ғанын қалаймыз, деді Мем­лекет басшысы. Елбасы, сондай-ақ Қазақстан­ның мұсылман әлемімен өзара қа­ты­насты жақсарту сыртқы саясат­тағы басым бағыттарының бірі еке­нін атап өтті. Осы орайда Қа­зақ­станның Иорданиямен арадағы қарым-қатынасының жоғары деңгейде екенін ауызға алды. Біздің елдеріміздің арасындағы ынтымақтастықтың жақсы дамып келе жатқаны соңғы үш жылдың ішінде Иордания Королінің Қа­зақ­станға үш рет, Ал Қазақстан Пре­зидентінің Иорданияға екі рет ресми сапармен алмасқандары­нан-ақ көрініп тұр. Біз өзара ын­тымақтастықты одан әрі тереңдете түсуге мүдделіміз, деді осы орайда Иордания елшісі С.Арабиат. Қазақстан араб әлемінің же­тек­ші елдерінің бірі – Сауд Ара­биясы Корольдігімен де ын­ты­мақтастықты дамытуға үлкен на­зар аударады, деген Президент жа­ңадан тағайындалған Саудия елші­сі А.Хакимге Саудия Королі Аб­дал­ла бен Абдель Азизді Қазақ­станға ресми сапармен келуге шақыратынын жеткізуді тапсырды. Біздің елдеріміздің арасындағы экономикалық және мәдени-гу­манитарлық байланыстар ойдағы­дай дамуда, дей келіп, Нұрсұлтан Әбішұлы Қазақстан азаматтары­ның қажылық сапарына баратын­дарының саны жыл сайын артып келе жатқанын атап өтті. Биыл қа­жы­лыққа біздің елімізден 4 мың­нан астам азамат барды, деді Елбасы. Жапон елшісі Ю.Харадамен екіжақты әңгіме барысында Елба­сы Күншығыс елін маңызды әріп­тес ретінде бағалайтынын атап көр­сетті. Токионың “Орталық Азия-Жапония” үнқатысуын да­мыту жөніндегі бастамаларына жо­ғары баға берді. Қазір Қазақстан-Жапония ынтымақтастығының не­гізгі бағыттарына инвестиция мен технологиялар және ядролық энергетиканы бейбіт мақсатқа пай­далану, сондай-ақ экология са­ласындағы жетістіктерді игеру іс­тері жататыны әңгіме арқауына айналды. Литва елшісі Р.Бернотаспен болған әңгімеде Елбасы Қазақ­станның Литвамен екіжақты қа­тынасты дамытуға мүдделі екенін атап өтті. Бүгіндері біздің елдері­міздің арасында әртүрлі деңгейдегі үнқатысулар қалыптасқан. Екі елдің парламенттерінде достық пен ынтымақтастық топтары жұ­мыс істейді. ЕҚЫҰ төрағалығын Қазақстаннан қабылдайтын Литва да қазір Ұйым шеңберіндегі қыз­меттерді абыроймен атқару үшін  үлкен дайындық жүргізу үстінде. Венгрия елшісі Имре Ласлоц­кимен болған әңгімеде де екі­жақ­ты қарым-қатынасты тереңдетудің кейбір мәселелері қаралды. Алды­мыздағы жылы Еуроодаққа төр­ағалық ететін Венгрия осы ұйым­ның Қазақстанмен арадағы  бай­ланысын тереңдете түсуге ықпал етер деген үміт айтылды.  Біз Вен­гриямен өзара ынтымақтастықты барлық салада да тереңдете түсуге дайынбыз, деді Елбасы елшіге қаратып. Қабылдаудан шыққаннан кейін елшілер журналистермен брифинг өткізіп, олардың сұрақтарына жауап берді. Соның ішінде Литва елшісі Р.Бернотас өз елінің ЕҚЫҰ-дағы төрағалыққа 2011 жылы кірісетінін айта келіп, “Қа­зақстан төрағалығы Ұйым мүше­лері күткеннен әлдеқайда артық әрекеттер жасады”, деп атап өтті. Өз елінің де осындай биіктен көрі­ну­ге ұмтылатынын мәлімдеді. Жақсыбай САМРАТ.