Саламатты ой-ниет салтанаты

Кеше елордада ЕҚЫҰ Саммиті елу алты елді бір пәтуаға келтірген   Астана декларациясын қабылдаумен аяқталды. Еуразия құрлығындағы саяси өмірдің жаңа белесін бастайтын бұл ұлы жиын еліміздің  дүйім дүниедегі беделін биіктете түсті. Абыройымыз  асқақтай берсін, ардақты ағайын!

Астана декларациясы қабылданды

Сонымен, бәріміз көптен күткен, толқи күткен Астана Саммиті өз мәресіне жетті. Осы арқылы еліміздің әлемге әйгілі Ұйымға төр­ағалық ету, оның талай жылдар­дан бері ша­қырылмаған саммитін ұйымдас­тыру жө­нін­дегі жұмысы да негізінен қоры­тын­дыланды. Тамаша қорытындыланды. Саммитте Астана Дек­лара­циясы қабыл­дан­ды. Оның мәтіні га­зет­тің келесі нөмірін­де жа­рияланады. Бұл – Қазақстан төр­аға­лы­ғы­ның тамаша табысы, еліміздің жасам­паздық жолындағы жаңа жарқын жеңісі. Сам­митке қатысушы­лардың атап көрсет­кеніндей, бұл Декларация Ұйым өміріндегі ғана емес, жал­пы­­адамзаттық қауіпсіздік тұрғысынан алған­да да үлкен тарихи оқиға ретінде баға­ланбақ. Араға он бір жыл салып барып, Қазақ­станның бастамасымен және Қазақ­стан бас­шысының белсенділік танытуымен ша­қы­рыл­ған Астана Саммитінің аяқталуына бай­ланысты ЕҚЫҰ-ға төр­ағалық етуші және Саммитті өткізуші ел­дің басшысы Нұр­сұл­тан Назарбаев қоры­тынды сөз сөйледі. Қабылданған Декларация Ұйым өмірінің жаңа кезеңінің бетін ашатындығын, бұл құжат шын мәнінде тарихи құжат болып та­былатындығын атап көрсеткен Елбасы оны қабылдау жолында көптеген пікір таластары орын алғанымен, ортақ бір келісімге қол жет­кізе білген ЕҚЫҰ-ға қатысушы мемлекеттер басшыларына, сондай-ақ Ұйымның құры­лым­­дық институттары жетекшілеріне шы­найы алғысын білдірді. Еуро­ат­лан­ти­ка­лық және Еуразиялық кеңістікте қауіпсіздік жо­лында жаңа негіз болып қаланған осы бір тарихи құжаттың қабылдануымен құттық­тады. Саммитке төрағалық еткен Қазақстан Президенті Нұрсұлтан Назарбаев Ұйымға мү­ше мемлекеттер делегацияларын жиын­ның басты жетістігімен құттықтаған соң, Еуропалық Одақ­тың, Канаданың, Молдова Республика­сының, Румыния Респуб­ли­ка­сы­ның, Италия Республикасының, Чех Респуб­ли­касының, Ресей Федерациясының өкілдері Астана Дек­ла­рациясына түсіндірмелік мә­лім­демелерін жария етті. Олардың бәрінің дерлік айтары Саммитте созылмалы қақ­ты­ғыстардың шешімін табудың толық сәті түс­пе­генін атап көрсетуге саяды. Мәлімдемелер мәтіндері Саммит хат­та­масына қосымша тір­­келетін болды. Саммит барысындағы пі­кір­таластардың қандайлық қызба-қызу өт­кендігінің бір белгісі ретінде Чехия өкілінің түсіндірмелік мәлімдеме мәті­нін оқуға келгенде үні шықпай қалғанын айта аламыз. Ай­тыса-айтыса дауысы қарлыққан өкілдің қа­ғазын оқып беруге басқа адам көмекке келді. Осы ретте ЕҚЫҰ-ның Іс басындағы төрағасы Қанат Саудабаевтың да түсіндірм­е­лік мәлімдеме жасағанын айта кетейік. Жал­пы алғанда, жоғарыда түсіндірмелік мәлім­де­ме­лерін жасаған мемлекеттер өкіл­дері ЕҚЫҰ-ның жауапкершілігі аумағын­дағы проб­­лемалардың бәрі бірдей шешімін таппа­ға­нымен, Саммиттің тарихи маңызын атап көрсетті. Сонымен қатар, бәрі бір­ауыздан оны тамаша өткізе білген қонақ­жай Қазақ­стан мемлекеті мен оның басшысы Нұр­сұлтан Назарбаевқа алғыс­ тарын білдірді. ЕҚЫҰ-ның 2011 жылғы төрағасы ретінде сөз берілген Литва Республикасының Пре­­зиденті Даля Грибаускайте бүгін (иә, «бүгін» деп таңғы газетке тән емес сөзді қол­данатын жөніміз бар: Елбасымыз Нұр­сұл­тан Назарбаев Астана Декларациясы қа­был­данғанын жария етіп, төрағалық балға­сын соққан сәтте сағат тілі 00.06-ны көр­сет­кен болатын) қоры­тын­дыланған Астана Сам­митін және Қазақ­станның жыл ішіндегі төрағалығын жоғары бағалай келіп, Литва­ның келесі жылғы төр­ағалығында Литва Рес­публикасы ЕҚЫҰ-ның үш өлшемі ая­сында қауіпсіздікті қамта­ма­сыз ету бағы­тында ойдағыдай жұмыс істейтіндіктеріне сендірді және Қазақстанның төраға­лығы ба­рысындағы қолға алынған ауқым­ды ша­ра­лар­ды әрі қарай жалғасты­ра­тындық­тарын жария етті.