Ешқандай кідіріс те, проблема да болмады

Осы жылдың 1-2 желтоқсанында Ас­танада ЕҚЫҰ-ның жоғары деңгей­дегі Саммиті өтті. Саммит жұмысын насихаттап, көрсету үшін Ұйымға қатысушы елдердің барлығынан дерлік бұқаралық ақпарат құрал­дары­ның өкілдері келді. Олардың жұмыс істеуіне Қазақ ұлттық өнер универ­ситетінің ғимаратында ор­на­ласқан Баспасөз орталығы толықтай мүм­кін­дік туғызды. Баспасөз орталығының жабдық­та­луы қазақстандық журналистердің де, шетелдік журналистердің де көңілінен шықты деп айтуымызға әбден болады. Астана Саммитінен ақпараттар таратуға Ұйымға мүше мемлекеттерден 1 300-ге жуық бұ­қа­ралық ақпарат құралдарының өкілдері келді. Олардың жұмыс істеуі үшін бір мыңнан астам орын жабдық­та­лыпты. Оның 400-і ноутбуктермен, ал қалған 600-і қажетті кабельді қосыл­ғыштармен қамтамасыз етілген. Соны­мен қатар, Қа­зақ ұлттық өнер университеті ғимара­ты­ның бірінші және екінші қабаттарына газет-журнал редакция­лары­­ның журналистері үшін 400 дана дербес компьютер орнатылған. Бұл жұмыс орындарының барлығына, яғни екі жұмыс үстеліне бір телефон қо­йыл­ған. Бұқаралық ақпарат құралдары­ның өкілдері осы телефондар арқылы қала­ара­лық және халықаралық байланысқа, сондай-ақ жоғары жылдам­дықтағы интернет желісіне шыға алды. Байла­ныс­тың барлық түрі тегін болды. Баспасөз орталығындағы арнайы жаб­дықталған алты-жеті залдың барлы­ғына лазерлік принтерлер, сканерлер мен көшіріп алу аппараттары орнатыл­ған. Ал электронды ақпарат құрал­дарының хабар таратулары үшін жаб­дық­талған орын­дардың барлығы қажет­ті ақпарат­тық-техникалық құралдармен толықтай қам­тамасыз етілген. Журна­лис­тердің қы­сылып-қымтырылмай жұ­мыс істеулеріне барлық мүмкіндік қа­рас­тырылған. Оны Саммит барысында анық байқадық. Бұлардан бөлек, баспасөз орталы­ғын­да Саммит аясында делегация бас­шыларының, Ұйым құрылымдары же­тек­шілерінің сұхбаттар берулеріне ар­нал­ған екі бөлме, баспасөз мәсли­хат­тарын өткізулері үшін тағы екі зал жаб­дықталған. Бұл залдардың бірі – 100 орын­дық, екіншісі – 400 орындық. Бұқа­ралық ақпарат құралдары өкілдері жұмыс істейтін залдар мен бөлмелердің барлығы тыңдағыш аппараттармен қам­та­масыз етіліпті. Ал Саммит оты­рыс­та­рында сөз сөйлеген мемлекеттер бас­шы­­­ларының, делегациялар жетекші­лері­нің сөздері телеэкрандар арқылы ЕҚЫҰ-ның ресми тілдері – ағылшын, француз, неміс, итальян, орыс және испан тілдеріне бірден аударылып тұрды. Баспасөз орталығындағы залдарда орнатылған құрал-жабдықтардың, басқа да аппараттардың жоғары деңгейде жұмыс істеуін қадағалайтын, яғни тех­никалық қолдау көрсететін мамандар да тәулік бойы жұмыс істеді. Мысалы, алдыңдағы ноутбук немесе өзге де аппарат сыр бере қалса, техник-мамандар сол сәтте жаныңнан табылады. Осылар­ды көресің де – риза боласың. Біз осы екі күн ішінде алыс-жақын шет елдерден келген журналистердің бір­­қатарымен танысып, әңгімелесіп көр­­ген едік. Олардың басым көпшілігі осын­дай халықаралық ірі жиындарға қа­тысып, талай елдің дәмін татып көр­ген әріптестеріміз екен. Баспасөз орта­лы­ғының жабдықталуы және қыз­мет көр­сетуі жөнінде пікірлерін де білген бо­латынбыз. АҚШ-тың, Италияның, Гер­манияның, Ресейдің, сондай-ақ өзі­міз бір залда көршілес отырған Арме­ния­ның журналистері баспасөз орталы­ғының жоғары деңгейде жабдықтал­ға­нына, ақ­парат жіберу және ақпарат алу бары­сында ешқандай кідірістер болма­ға­нына ризашылықтарын білдірді. Сон­дай-ақ шетелдік әріптестеріміз өз­дері­нің талай елде болғанын, ірі халық­аралық жиын­дар­дан ақпарат таратқан­дарын алға тарта отырып, бұқаралық ақ­парат құралдары үшін дәл осындай қа­жетті ақпараттың құралдармен жаб­дықталған баспасөз орталығын кездестірмегендерін қызыға әрі риза болған ниетте айтып отырды. Біз, қазақстандық журналистер іштей мақ­тан­дық әрі риза болдық. Тағы бір айта кететін нәрсе, бұқара­лық ақпарат құралдары өкілдерінің та­мақтануы дер едік. Сол үшін ғимарат­тың екінші және үшінші қабаттарында та­мақтанатын орындар қарастырылған еді. Дастарқанда қазақтың қазы-қар­та­сы, жал-жаясы, өзге де тағамдары мо­лы­нан болды. Бұдан бөлек, шай-кофе, басқа да сусындар ішетін орындар да бар. Бұ­ларда даяшы-волентер қыз-жігіт­тер зыр жүгіріп қызмет көрсетті. Бас аспаздың айтуынша, мұнда әкелі­нетін азық-түлік­тің және дайындалатын ас-тағамдардың барлығы алдын ала ар­найы лабора­тория­лық тексеруден өткізіледі. Бұқаралық ақпарат құралдары өкіл­дерін жайлы көлік түрлерімен тасымал­дау жайы да жоғары деңгейде ұйымдас­тырылғаны көрініп тұрды. Журналистер орналасқан қонақ үйлер мен баспасөз орталығы арасында әр 30 минөт сайын автобус қатынасы жүріп тұрды. Соны­мен қатар, БАҚ өкілдері үшін Саммит кезінде әуежай – қонақ үйлер – баспасөз орталығы – қонақ үйлер – әуежай ара­лы­ғында көлік тасымалы да ұйымдас­тырылған. Бұл жағынан да ешқандай кідіріс, ешқандай проблема болмады. Баспасөз орталығының орталық бө­лі­гінде телеарна  журналистерінің Сам­­мит кезінде жиынға қатысушы­лар­дан сұхбат­тар жүргізулеріне арналған баннерлер орнатылған. Сондай-ақ ғи­марат­тың бас кіреберісіндегі холлдың екі жағында журналистердің қажетті хабарламалар алатын ақпараттық үстел де  жұмыс істеді. Оның бірі – шетелдік, екіншісі – қазақстандық БАҚ өкілдеріне арналған. Тағы бір атап өтер нәрсе, теле­компаниялардың өздерінің қозғалмалы телестансаларын баспасөз орталығы орналасқан Қазақ ұлттық өнер университеті ғимаратының жанына орналас­тыруға мүмкіндік жасалғандығы. Теле­хабарлар тарататын әріптестеріміздің айтуынша, баспасөз орталығында тікелей эфирге шығуға және бейне­көрініс­тер жазылған таспаларды өңдеуге де бар­лық жағдайлар қарастырылған. Жал­пы, ЕҚЫҰ-ның жоғары деңгейдегі Сам­митінен, сондай-ақ Саммит қарсаңында өткізілген Шолу конференциясынан ақ­параттар, телехабарлар жөнелтуде қан­дай да бір проблема туындамады. Он­дай сөзді өзгелерден де естімедік, өзіміз де кездестірмедік. Әлисұлтан ҚҰЛАНБАЙ.