Үкіметін ықшамдады
Украина президенті Виктор Янукович ел үкіметі құрамын мықтап қысқартты – 8 министр азайып, 4 министрлік жойылды. Жалпы шенеуніктер құрамының үштен біріндейі қысқарса керек. Үкімет басшысының 4 орынбасары өз қызметімен қоса министрліктерді де басқарады. Бұрын үкіметте 20 министрлік болса, енді – 16. Сотқа берілді Оңтүстік Корея Солтүстік Кореяны әскери қылмысы үшін Гаагадағы Халықаралық қылмыстық сотқа берді. Әңгіме мынада. Биылғы наурыз айында Сарытеңізде Оңтүстік Кореяның «Чхонан» корветі торпедалық шабуылға ұшырап, 46 әскери қаза болған. Оған КХДР жауапты делінеді. Сондай-ақ жақында ғана олардың қарулы күштері оңтүстік жақтағы Енпхендо аралын атқылап, екі әскери, екі бейбіт тұрғын қазаға ұшырады. Сол үшін Сеул Пхеньянды айыптап, жазалауды сұраған. Халықаралық сот істі тергеуді бастап кетті. Билікте – әйелдер Орталық Еуропадағы ең дамыған елдің бірі – Швейцарияда президент болып тағы да әйел азамат – Мишлин Кальми-Рей сайланды. Ол Дэрис Лойтардты алмастырды және бұл елде президент болған төртінші әйел азамат. Бұл елдегі мемлекет басшысын сайлау басқа жердегіден өзгешерек. Ол бір жылға парламенттің қос палатасының мәжілісінде үкімет мүшелері арасынан сайланады. Ал үкімет құрамында жеті ғана мүше болады. Қазір оның төртеуі – әйел азаматтар. Мұрагерге шабуыл Лондонның қақ ортасында университеттегі оқу бағасын көтеруге қарсы шеруге шыққандар Британия тағына мұрагер шахзада Чарльз бен оның зайыбы мінген автокөлікке шабуыл жасапты. Әрине, полиция құрметті адамдардың жапа шегуіне жол бермеген. Мұндай келеңсіз оқиғаға байланысты елдің үкімет басшысы Дэвид Кэмерон ресми мәлімдеме жасап, өз өкінішін білдірген және құқық орындарына айыптыларды анықтап, тиісті жаза қолдануды тапсырды. Соған орай 20 адам қамауға алыныпты. Қайырымдылыққа ант берді Байлары қайырымды ел – берекелі, деген қағида бар. Қайырымдылыққа әлемнің алпауыт байлары да бет бұра бастағандай. Оның бастамашылары атақты миллиардерлер Билл Гейтс пен Уоррен Баффет болған еді. Қазір қайырымды байлардың клубы бар. Жақында оған жаңадан 16 миллиардер қосылып, жалпы саны 50-ге жетті. Клубқа кіру үшін «Сый тарту антын» қабылдауы керек. Бұл өзі клубтың жарғысы іспетті. Онда пәлен қаржы берем деп, сомасын көрсету міндет емес. Сөйтсе де жақсылыққа ант берген жақсы ғой. Сезікті секірер Хорватияның бұрынғы премьер-министрі Иво Санадер ел парламенті оның депутаттық дербес құқықтылығын жою жөнінде мәселе қарап жатқанда, көрші Словенияға қашып үлгерді. Бірақ ол Австрияда ұсталыпты. Сірә, ол өзіне мықтап қауіп төнгенін аңғартса керек. Санадер өткен жылы өзінің премьерлік мерзімі бітпей жатып-ақ қызметінен кеткен болатын. Жұрттың айтуына қарағанда, оның сыбайлас жемқорлыққа қатысы бар көрінеді. Әзірлеген Мамадияр ЖАҚЫП.
