Жеті жобаның бірі

Атырау жылу-электр орталығының төртінші кезегі іске қосылды Атырауда электр қуатына сұраныс артып келеді. Осыған орай Атырау жы­лу-электр орталығының қуатын одан әрі ұлғайту жобасы қолға алынған еді. Жобаның құны – 16,5 млрд. теңге. Кә­сіп­орын­ның өз есебінен шығарылған осы­нау қомақты қаржыға іске асы­рыл­ған жоба Атырау жылу-электр ор­талы­ғы­ның қуатын бұрынғыдан 75 ме­га­ват­қа арттырмақшы. Аталған жобаның 25 мегаваттық бастапқы қуатын Елбасы Нұрсұлтан  Назарбаев 2009 жылы өңір­ге келген сапарында іске қосып, облыс энергетиктеріне табыс тіледі. Осы жоба толық қуатында жұмыс жасағанда өңір­ді электр энергиясымен қамтуда 2012 жылға дейін еш қиындық туындамайды. Ал, жы­лу энергиясының қажеттілігі қазіргі қуаттармен-ақ өтеледі деп сендірген кәсіпорын басшылары мұ­ны­мен шектеліп қалуды көздемейді. Алдағы жыл­да­ры тағы да 75 мегаваттық электр және 169 гика­ка­лориялық жылу энергияларын қатарға қосуды жоспарлап қойған. Бұл жаңа қуаттар пайдалануға берілгенде 2015-2018 жылдарға дейінгі сұранысты то­лығымен қамту мүмкін болмақ. Дегенмен, мұ­найлы өңір экономикасы жыл сайын қарқынды дамуда. Демек, электр энергиясын тұтынуға сұраныс арта бермек.  Демек, 2020 жылға дейінгі мүмкін қа­жет­тілік осы кезден назарға алынып, келешекте та­ғы да қуаты 75 мегаваттан кем болмайтын екі бу турбинасын салу жайы талқылануда. Кеше Атырау жылу-электр орталығының 75 мегаваттық қуат беретін төртінші кезегі  пай­да­ла­ну­ға берілді. Мұның өңір үшін қандай маңызы бар? Аты­рау жылу-электр орталығы АҚ президенті Мұхамбетқали Қалиевтің айтуынша, бұл алдымен, еліміздегі серпінді жобалардың бірі.  Елбасының өзі бұған айрықша маңыз беріп, еліміздің әлеу­мет­тік-экономикалық әлеуетін одан әрі арттыруға мүмкіндік жасайтын жоба ретінде атады. Сонымен қа­тар, жыл санап өсіп келе жатқан мұнайлы ме­кен­нің энергетикалық қуаттарға деген сұранысы толық қамтамасыз етіледі. Қатарға қосылып жатқан жаңа кә­сіпорындар, тұрғын үйлер мен әлеуметтік ны­сан­дар электр және жылу энергияларына сенімді қо­сы­лады. Осы мақсат үшін Ресейдің Калуга қаласынан жаңа үш бу турбинасы әкелініп, орнатылған. – Бүгін өңір үшін ең маңызды жоба іске қо­сыл­ды, –деді облыс әкімі Бергей Рысқалиев жобаның пайдалануға берілу салтанатында. –Бұл биыл біздің облыста іске асырылған жеті жобаның бірі. Енді өңі­рімізде электр энергиясының тапшылығы бол­майды. Жаңа өндіріс ошағында жаңа жұмыс орын­дары ашылды. Қазірдің өзінде 117 адам  жұмысқа қа­былданды. Олардың бәрі де кәсіби біліктілігін же­тілдірген осы жердің адамдары. Ал, құрылыс жұ­мыстарына 300-дей адам тартылды. Ең бастысы, өңірдің энергетикалық қауіпсіздігі қамтамасыз етіледі. Себебі, осы жобаны іске қосу арқылы Атырау об­лысы іргелес Ресей мен Маңғыстаудың энер­ге­тикалық қуаттарына деген тәуелділіктен құтылады. Атырау энергетиктері электр және жылу энер­гия­ларын тұтынушыға таратуға баса мән беріп отыр. Қысқа мерзімде ғана бір мың шақырымнан аса жаңа электр желісі тартылып, 90-ға жуық электр энергиясымен қамту нысандары қатарға қо­сылды. Олардың ішінде 55 трансформатор  бар. Қолданыстағы электр жабдықтары жоспарлы түрде күрделі жөндеуден өтіп келеді. Өйткені, Атырау жылу-электр орталығының бастапқы жобалануы со­нау 1953-1955 жылдары қолға алынып, 1963 жылы  бірінші кезегі қатарға қосылды. Ал, оның екін­ші кезегі 1969-1970 жылдары пайдалануға берілсе, үшінші кезегі 1976 жылы пайдалануға тап­сырылған екен. Енді міне, жарты ғасырдан кейін Атырау жылу-электр орталығының төртінші кезегі іске қосылды. – Бұрын біздің орталықта 215 мегаваттық қуат өндірілетін. Бұл өңірдің электр энергиясына қажет­ті­лігін толық өтей алмады. Сол себептен көршілес Маң­ғыстау облысынан, Ресейден қосымша қуат алып келдік. Енді бұрынғыға қосымша 75 ме­га­ват­тық қуат өндіретін жаңа жобаны іске қостық. Сөйтіп, Атырауда өндірілетін қуат көзі 290 ме­га­ват­қа жетіп отыр. Бұдан былай өңірдің электр энер­гия­сына қажетті қуатты өзіміз өндіре аламыз. Со­ны­мен бірге, электр энергиясының қоры да жасақталады, – деді газет тілшісіне «Атырау жылу-электр ор­талығы» АҚ президенті Мұхамбетқали Қалиев. Жолдасбек ШӨПЕҒҰЛ. Атырау облысы.