Таңдау бар жерде бәсеке бар

Биыл жазда ашылып, осы күн­ге дейін 40 нөмірін шығарып, бар­лық әріптестеріне қырқы­мыз­дан шыққан күнге куә болыңыз­дар деген «Халық сөзі» газеті мен «Шығармашылық билет» бірлестігі ұйымдастырған конференция екі мақсаттың төңірегіне арнал­ған екен. Оның алғашқысы – БАҚ пен халық арасындағы байланыс, қазақ басылымы мен дизайн болса, екіншісі– «Халық сөзін» қыр­қынан шығару. Парламент Мәжілісінің депу­таты Жарасбай Сүлейменов, Бай­ла­ныс және ақпарат министрлі­гі­нің Ақпарат және мұрағат комитеті төрағасының орынбасары Ербол Шаймерден, Қазақстан Журналистер одағының төрағасы Сейітқазы Матаев, «Нұр Медиа» холдингі бас директорының орын­­ба­сары Альберт Төлегенұлының сөздері қазақ тілді басылымдар көтеретін тақырыптарға, олардың дизайнына арналды. Филология ғылымдарының док­­торы, профессор Бауыржан Жақып тұсаукесер, беташар тәрізді рәсім­дерді көргенін айта келіп, газеттің қырқынан шығуына бірінші келуім, деп жұртшылықты бір күлдіріп, желпінтіп тастап, жаңа басылым шынында да бүгінгі сөз етіп отырған тақырыпқа жауап беретін, безендірілуі өзгеше, бояулы газет екен, жақсы басылым дүниеге келіпті, соған қуандық және оны шығарушылардың барлығы менің шәкірттерім, жастар екен, деді. «Халық сөзі» жақсы шығып жатыр, бірақ осы қалада қазақша газет сатылатын екі-ақ дүңгіршек бар. Барсаң, кейде ол өтіп кетіп қолға тимей жатады, сондықтан бізге газет тарату мәселесін де қарастырған дұрыс», – деді ақын Серік Тұрғынбеков. Сонымен, құрметті оқырман, қа­зақ тілді жаңа бір басылым қырқынан шықты. Анар ТӨЛЕУХАНҚЫЗЫ.