«Біз қуатты Қазақстан үшін Елбасымен біргеміз!»

Өскеменде еліміздің Тұңғыш Президенті – Елбасы Нұр­сұл­тан Назарбаевтың  өкілеттігін 2020 жылғы желтоқ­санға дейін ұзарту мақсатында бүкілхалықтық референдум өткізу жөнінде рес­пуб­ли­калық ынталы топтың жиы­ны болып өтті. Бұдан бұрын да Елбасына ерекше сенім көрсетіп, оның өкі­леттігін ұзартатын референдум өткізу жөніндегі пікірлер ес­тіліп қалатын. Сондықтан да Шығыс Қазақстан облысының ынталы тобы жасаған ұсыныс көпшілік­тің көңілінен шықты. Ын­талы топтың төрағасы Шәкә­рім атын­дағы Семей мемлекеттік универ­си­тетінің ректоры, профессор  Е.Сы­дықов, облыс­тық ардагерлер кеңесінің төр­ағасы Г.Бер­дюгин, Шемонаиха ауданындағы «Қамысты» шаруа қожалығының төрағасы В.Аку­лов, жол салу­дың шебері, «Құр­мет» орденді, об­лыстық мәс­лихаттың депу­та­ты Т.Исабаев, Семейдегі орыс мә­дени-әлеу­меттік қоғамының төр­ағасы, про­фессор М.­Па­нин, А.То­мо­шенко, облыстық кәсіп­одақ­тар кеңесінің төр­айы­мы Н.Тү­сіпова – барлығы жеті адам Ел­басының тәуелсіз Қазақ­станға сі­ңірген еңбегіне жоғары баға бере келіп, бүкілхалықтық референдум өткізу жөнінде бастама көтерді. – Соңғы жылдары қоғамдық пікір Елбасына сенім көрсетіп, ре­ферендум өткізу арқылы өз көш­басшымызды сайлап алу тө­ңі­регінде өрбіп келеді. Қазір Қазақстанның атақ-даңқы бүкіл әлемге танымал. Күні кеше аяқталған Астанадағы ЕҚЫҰ-ның Саммиті еліміздің абы­рой­ын асқақтатып, көк бай­ра­ғы­мыз­ды желбіретті. Елімізде 140 эт­нос өкілдері татулықта, ынты­мақ­­тастықта өмір сүріп жатыр. Қа­зақстан экономикасы алға ба­сып келеді. Шынымды айтайын, бүгінгі жиынды бүкіл халық қызу қолдайды деген сенімдемін. Жиынға еліміздің 16 өңі­рінен 850 адам қатысып отыр, – деді Ерлан Бәтташұлы. Бұдан кейін жиналыстың күн тәртібі белгіленді. Онда рес­пуб­ликалық ынталы топты құру, ын­талы топтың төрағасы және орын­басарларын сайлау, Қазақ­стан хал­қына Үндеу қабылдау көзделіпті. Профессор М.Панин өз сө­зінде Елбасының беделі мен іскерлігі, бүкіл әлем жұрт­шы­лы­ғының Елбасына деген құрметі жөнінде айта келіп, күні кеше Астанада өткен ЕҚЫҰ-ның Сам­миті Қазақстанның беделін бүкіл әлемге паш еткенін жеткізді. Экономика өркендеп келеді. Ендеше Елбасымызға сенім көр­сетіп, оның өкілеттігін ұзар­татын бүкілхалықтық референдум өткізу әбден піскен мәселе, деді шешен. – Бұдан біраз уақыт бұрын «Свобода слова» газетінде Ел­ба­сы­ның көмекшісі Е.Ертіс­баев­тың тілшімен сұхбаты жария­лан­ды. Газет редакторы Гүлжан Ер­ғалиева маған телефон ша­лып, сұхбат жөнінде пікірімді сұ­рады. Аталмыш сұхбатта Ел­ба­сының Пре­зидент сайлауына түсу жө­нін­дегі ниеті бар екендігі ай­тылған болатын. Мен ойымды ай­тып, сайлау өткізудің орнына бүкілхалықтық референдум өт­кізудің тиімді жақтары жайлы айттым. Оның бірнеше себебі бар. Елбасының беделі, дүние жүзіндегі мәртебесі сайлауда да жеңімпаз болатынын айтпаса да айғақтап тұр. Демек, референ­думның тиімді жақтары аз емес. Мәселен, шағын ғана мемлекет Сингапурды алайық. Ол елдің Президенті 30 жыл бойы халық­ты іскерлікпен басқарып, эконо­микасын әлемде бірінші орынға шығарды. Тіпті мықты деген Еуропа елдері қаржы дағдарысы кезінде экономикасы шайқалып, күйзеліске түсті. Мен Елбасына сенемін, әлі де халықты ұзақ жыл­дар іскерлікпен басқара береді деген сенімдемін. Яғни, референдум өткізу жөніндегі шы­ғысқазақстандықтардың идея­сын толық қолдаймын, – деді ақын, қоғам қайраткері Олжас Сүлейменов. – Құрметті отандастар, мен саясаткер емеспін, сондықтан көп сөзге жоқпын. Отанымды қор­ғау үшін Бас қолбасшы Н.На­зарбаевқа ант бергенмін, сол сертке беріктігімді дәлелдегім келеді. Еңбегімді ескерді, «Халық Қаһарманы» деген жоғары атақты берген кезде, Елбасына бұл маған емес, бүкіл ауған соғысына қатысу­шыларға көрсетілген құрмет, Сізге адал қызмет етемін дегенмін. Бүгінгі жиынға қатысып отырған азаматтар көтеріп отыр­ған мәселе өте орынды. Елбасы­на құрмет көрсетсек, өзімізді де сыйлағанымыз, – деді «Халық Қаһарманы» Ба­қытжан Ертаев. «Егемен Қазақстан» респуб­ли­калық газеті» акционерлік қо­ғамының президенті Сауытбек Абдрахмановтың сөзін көпшілік ынта қоя тыңдады. Еліміздің жетістіктері туралы, елді сол биіктерге көтерген Елбасының ең­бегі туралы айта келіп, газет бас­шысы еліміздің абзал ағасы Бәй­кен Әшімовтің көзі тірісінде берген сұхбатында көрегендікпен келтірген пікірін жеткізді. Бәй­кен аға барша қазақстандық­тарға аманат ретінде былай деген екен: «Екі тізгін, бір шыл­бырды қолына еркін бергеннің арқасында, ел бастаған еріміз деп бүкіл халық болып сенген­нің арқасында, азаматымыз алға апарады деп соңынан ергеннің арқасында Нұрсұлтан Әбішұлы елдің көшін бір белестен бір белеске биіктетіп алып бара жа­тыр. Ана талапты сақтаймыз, мына жердің көңілінен шығамыз деп жүріп, саяси тартыстарды қолдан ұйымдастырып, көш қар­қынын қолдан кідіртетін,.. ха­лық­ты текке ырың-жырың ететін, жасампаздық істен алаңдата­тын қадамдардың ешқайсысы­ның да қажеті жоқ. Елдің тізгіні Нұрсұлтан Әбішұлы Назарбаев­тың қолында барынша ұзақ бо­луы үшін біз қолда бар мүм­кіндіктердің бәрін де жасауымыз керек... Тоқсаннан жасы асқан мына маған енді ештеңенің де керегі жоқ. Тек елдің тыныш­тығы, жердің бүтіндігі, елдің мерейі керек. Соның бәріне хал­қымызды жұмылдыратын, алыс асқарларға ұмтылдыратын Азамат бізде бар. Нұрсұлтан Әбіш­ұлының бастауымен біздің алар асуларымыз әлі алда. Елбасы­мыздың бергені көп, берері одан да көп. Ендеше азаматтың тілеуін тілейік». Жиында ҚР Парламенті Се­наты мен Мәжілісінің депутат­та­ры Н.Геллерт, Р.Халмұрадов, А.Баш­маков, Маңғыстау облыс­тық ардагерлер кеңесінің төр­аға­сы Ө.Озғанбаев, Шығыс Қазақ­стан облыстық мәс­лихатының депу­таты А.Қа­жы­баев, Батыс Қа­зақ­стан облыс­тық саз мек­те­бінің директоры С.Погодин, Қызыл­орда облы­сындағы «Риза» АҚ-тың төраға­сы С.Имандосов, Қарағанды қар­жы-экономикалық универ­си­те­тінің ректоры Е.Ай­ма­­ғам­бетов, Қостанай мемлекеттік уни­верситетінің ректоры А.Мә­­метов, тағы басқалар сөз алып, Елбасы басқаруымен еліміз талай белестерден асып, алға қа­рай батыл ілгерілеп келе жат­қаны жайлы ойларын ортаға сал­ды. Олардың барлығы Елбасы­ның өкі­леттігін ұзарту жөніндегі рефе­рендумды қолдайтынын айтты. Бұдан кейін Г.Бердюгин жи­ынның Қазақстан халқына Үн­деуін оқып берді. Әр облыс­тан кел­ген ынталы топ өкілде­рінің аты-жөндері аталды. Ынталы топты «Қамысты» шаруа қожа­лы­­ғының төрағасы В.Акулов бас­қар­мақ, оның орынбасарлары бекітілді. Оңдасын ЕЛУБАЙ.