ПАРЛАМЕНТ «Егемен Қазақстанның» арнаулы беті

«НҰР ОТАН» ФРАКЦИЯСЫ ТӨРАЛҚАСЫНЫҢ ОТЫРЫСЫ

«Нұр Отан» ХДП-ның Парламент Мәжі­лісіндегі фракциясы төралқасының отырысы өтті. Отырысты Мәжіліс Төрағасы, аталған партияның фракция жетекшісі Орал Мұхамеджанов жүргізді, деп хабарлады осы палатаның баспасөз қызметі. Төралқа отырысында Парламент Мәжілісінің депутаттары – «Нұр Отан» ХДП фракциясы мүшелерінің 2010 жылғы 25 қа­ра­ша мен 4 желтоқсан ара­лы­ғында республика өңірлерінде атқарған жұмыстарының қоры­тындылары қаралды. Отырыста «Нұр Отан» ХДП фракциясы жетекшісінің орын­басары Владимир Нехорошев: «2010 жылғы 25 қараша мен 4 жел­тоқсан аралығында біздің фракцияның депутаттары елдің ағымдағы әлеуметтік-эконо­ми­ка­лық даму жағдайы туралы, рес­пуб­ликаны үдемелі индустрия­лық-инновациялық дамытудың бесжылдық жоспарын түсіндіру және 2020 жылға дейінгі Қа­зақстан Республикасын дамы­ту­дың Стратегиялық жоспарында жүктелген ауқымды міндеттері тұрғысында оның іске асуын заң­намалық қамтамасыз ету туралы сайлаушыларды ақпараттандыру мақсатында ел өңірлеріне барып қайтты», – деді өз есебінде. Оның мәлімдеуінше, сапар ба­рысында фракция мүшелері 377 елді мекенді аралап, 89 500-ден астам адамның қатысуымен шамамен 898 кездесу өткізген. Депутаттар сайлаушыларды эко­но­­миканың дағдарыстан кейінгі дамуы туралы, оны модернизация­лау, елді индустрияландыру кар­тасы шеңберінде инновациялық жобаларды пайдалануға беру, тұр­ғындардың өмір деңгейі мен сапа­сын арттыруға бағытталған шаралар жайынан да хабардар еткен. Жұмысы қарқын алып келе жатқан Беларусь, Қазақстан және Ресей Кеден одағының қызметі туралы ақпарат бере отырып, депутаттар Бірыңғай экономикалық кеңістікті құруға алғышарт бола­тын интеграция үдерістерінің оң нәтижелері жайынан да сай­лаушыларды хабардар еткен. Кездесулер барысында әлеу­меттік қорғау және әлеуметтік аз қамтылған тұрғындарды қол­дау­ды қамтамасыз ету, кәсіпкерлік сек­тор­ды одан әрі сауықтыру және жұмыс орындарын құруға мүм­кін­дік беретін «Бизнестің жол кар­тасы–2020» мен Өңірлік жұ­мыс­пен қамту және кадрларды қай­та даярлау стратегиясының (Жол картасы-2010) іске асу ба­ры­сы туралы да пікір алмасулар болған. Тауарларға бағаның өсуі тұр­ғындарды толғандырып жүр­гені ескеріле отырып, депутаттар аза­мат­тарды бағаның шарықтауына жол бермеу үшін бұл мәселені заңнамалық тұрғыда қамтамасыз ету мақсатында атқарылып жат­қан кешенді шаралармен таныс­тырып өтті. Депутаттар сайлаушыларға Пар­­ламент Мәжілісінің заң шы­ғарушылық қызметі, Қазақ­стан Республикасы Президенті­нің «Қа­зақ­стан Республика­сын­дағы құқық қорғау қызметі мен сот жүйесінің тиімділігін арттыру бойынша шаралар туралы» Жар­лығына сәйкес дайындалған, құ­қық қорғау мен сот жүйесін модернизациялаудың құқықтық базасын қалыптастыру бойынша заң жобалары топтама­сын қабыл­дау, олардың тиімділігін арттыру туралы егжей-тегжейлі ақпарат берді. Кездесулер барысында депутаттар қазақстандықтардың биік патриотизмін, олардың үсті­міздегі жылдың 1-2 желтоқ­са­нында Астана қаласында ЕҚЫҰ Саммитінің сәтті өтуіне деген мақтанышын аңғарды. Бұл пла­нетааралық ауқымдағы іс-шара Қазақстанның жұлдызды сәті, Қазақстан мен ел Президенті, Елбасы Нұрсұлтан Назарбаевтың халықаралық беделін әлемдік аренада тану болды. Саммит пен «Қауіпсіз қауымдастыққа қарай» ЕҚЫҰ Астана Декларациясы та­рихқа «Астана рухы» ретінде енсе, республика азаматтары оны Қазақстанның бұл танымал әрі беделді халықаралық ұйымды сәт­ті басқаруының шарықтау шегі деп қабылдады. Депутаттардың сайлаушылар­мен атқарған көшпелі жұмысы «Нұр Отан» ХДП өңірлік фи­лиалдарымен тығыз қарым-қа­ты­наста ұйымдастырылды. Партия­ның қоғамдық қабылдауларында және азаматтардың тұрғылықты жер­лері бойынша Мәжіліс де­пу­таттары 1 700 сайлаушыны қа­был­дап, 389 мәселе орынды шешілді. Өңірлердегі сайлаушылардың тұрғын үй-коммуналдық шаруа­шы­лық, аграрлық сектор, кәсіп­керлік, жолдар құрылысы, сапа­лы білім мен медициналық көмек алу, жастарды жұмысқа орна­лас­тыру, жас отбасыларды тұрғын үймен қамтамасыз ету және бас­қа мемлекеттік деңгейде шешімін табуы тиіс мәселелерін көтер­ді. Осындай көкейкесті жайлар­ды фракция мүшелерінің өңір­лер­ден келе сала 8 желтоқсанда өткізген Парламент Мәжілісінің жалпы отырысында лауазымды тұлғалар мен мемлекеттік орган­дардың атына жолданған депу­таттық сауалдарда да өз көрінісін тапты. Фракция мүшелерінің 347 ма­қалалары мен сұхбаттары бұқа­ра­лық ақпарат құралдарында жа­рық көрді. Бірқатар жария­ла­нымдар Қазақстанның ЕҚЫҰ-ға төрағалығы мен Үдемелі индус­триялық-инновациялық дамудың мемлекеттік бағдарламасының мә­селелеріне арналған.

* * *

ТӨЛҚҰЖАТ ПЕН ЖЕКЕ КУӘЛІК БІР ҚҰЖАТ ЕМЕС ПЕ?!

Менің қолыма қалам алуыма «Нұр Отан» халықтық-демокра­тия­лық партиясы облыстық филиалы­ның қоғамдық қабылдауы кезінде келген бір топ жас әйелдердің мә­лімдемесі себеп болып отыр. Жас аналар қазіргі уақытта өздерінің жеке куәлігінің болмауына бай­ла­нысты бала туған соң төленетін бір жолғы жәрдемақыны ала алмай отыр екен. Өкінішке қарай, олардың бар­лы­ғының төлқұжаттары бар. Бірақ, ол Қазақстаннан тыс аумақтарда ғана күшіне ие, ал Қазақстан аума­ғында тек жеке куәлік күшіне ие болып отыр. Мен  Қостанай қала­лық зейнетақы төлеу орталығының бастығы Хасанова Гүлсімнен сұ­ра­дым, ол: «Шындығында да барлық жәрдемақылар тек қана жеке куә­лік бойынша беріледі, қазіргі қа­лыптасқан тәжірибе бойынша төл­құжатты қабылдай алмаймыз, өйт­кені, прокуратура тексерген жағ­дайда біз ескертпе аламыз», – дейді. Ақылға сыйматын жағдай: төл­құжат пен жеке куәлікте – бір адам, тиісті анкеталық мәліметтердің барлығы біреу, мекен-жайы да бір, бірақ жеке куәлігіңді беруің керек. Ал жеке куәлік мамыр айынан бері Халыққа қызмет көрсету орталы­ғында жатыр, олар жұмыстарының көп екенін айтып, құжаттарды тек 2011 жылдың басында ғана бере аламыз дейді. Дәл осындай  мәлім­демелер Солтүстік Қазақстан об­лысы «Нұр Отан» ХДП фи­лиалында да болды. Қазақстанда халықты әлеумет­тік жағынан қолдау үшін көптеген жұмыстар атқарылып жатыр, бірақ жәрдемақыны ресімдеу құжат­тары­ның тізіміне төлқұжаттың қосыл­мауы себебінен халық заңда көз­делген жәрдемақыларын  инстан­цияларға жүгіру арқылы зорға алуда. Еңбек және халықты әлеуметтік қорғау министрлігі аталған мәсе­лені қарап, Қазақстан Республи­ка­сының заңына сәйкес тиісті түзе­тулер енгізу керек-ақ.

Бағила БАЙМАҒАМБЕТОВА, Мәжіліс депутаты.

* * *

ПАЛАТАНЫҢ ҚАРАУЫНА ЖІБЕРІЛДІ

Сенаттың Экономикалық және өңірлік саясат комитетінде «Қазақстан Республикасының Үкіметі мен Ресей Федера­ция­сының Үкіметі арасындағы Екібастұз ГРЭС-2 үшінші бло­гын салу және кейіннен пайдалану туралы келісімді ратификациялау туралы» және «Дүние­жүзілік пошта одағының Жар­ғысына Жетінші хаттаманы ратификациялау туралы» заң жо­балары талқыланды. Комитеттің сондай-ақ ке­ңей­­тіл­ген отырысында «Қа­зақ­стан Рес­публикасының кей­бір заңна­ма­лық актілеріне сауда қызме­тін реттеу мәсе­лелері бойынша өз­ге­рістер мен то­лықтырулар енгізу туралы» заң жобасы да қа­ралды. Заң жобасымен Әкімшілік құқық бұзушылық туралы кодекске, «Сауда қызметін реттеу туралы», «Импорттық тауарлар жағдайында ішкі нарық­ты қор­ғау шаралары туралы», «Агро­өнер­кәсіп кешені мен ауыл­дық аумақтарды дамыту­ды мем­лекеттік реттеу тура­лы», «Жеке кәсіпкерлік тура­лы», «Ли­цензиялау туралы» және «Мемлекеттік сатып алулар ту­ралы» заңдарға өзге­рістер енгізілмек. Заң жобасымен енгізілетін өзгерістер сауда қызметін жү­зеге асыру және экспорттық тауарларды ілгерілету үдеріс­те­рінде пайда болатын қа­тынас­тарды реттеудің тиімді жүйесін жасауды мақсат етеді. Жоба аясында әлеуметтік ма­ңызы бар азық-түлік тауар­лары бағасын тұрақтандыру мақ­­сатында оларға бөлшектік саудаға шығару бағасының шегін белгілеу құқығы Қазақ­стан Республикасының Үкі­метіне берілді, деп хабарлады Парламент Сенатының бас­пасөз қызметі.

* * *

АЯГӨЗ ӨҢІРІНІҢ АРДАГЕРЛЕРІ

мен мектеп мұғалімдері Мәжіліс үйінде болды

Шығыс Қазақстан облысының Аягөз ауданынан келген еңбек ардагерлері мен мектеп мұғалімдері Парламент үйіне келіп, депутаттардың заң шығарушылық қызметімен танысты. Шығысқазақстандықтарды Парламент Мәжілісінің депутаты Нұртай Сабильянов Мәжіліс үйінде қарсы алды. Айта кету керек, депу­тат­тың арнайы шақыруымен Шы­ғыс Қазақстан облысынан келген еңбек ардагерлері мен мектеп ұстаздары елорданың көрікті жерлерін аралап көрді. Шығысқазақстандық қонақтар Қазақстанның Тұңғыш Пре­зи­дентінің мұражайында, Бейбітшілік және келісім са­рай­ында, Астана қаласының іргесіндегі Қабанбай батыр кесенесінде, Президенттік мәде­ниет орталығының мұра­жай­ында, Сәкен Сейфуллин мұра­жайында және «Думан» ойын-сауық орталығында болып, үлкен әсер алды. Депутатпен кездесу кезінде Төлеубек Жұмабайұлы жасы сексеннен асқанын, ел­ор­даны көруді армандап жүр­ге­нін, міне, бірінші рет Ас­та­наға келіп, сәулетті шаһардың көкпен таласқан ғимарат­та­рын көріп, көңілі марқайып тұр­ғанын айтты. Елбасының бастамасымен іргесі қаланған Астананың 12 жылдың ішінде осындай көркейіп, әлемдегі ғажап қалалардың біріне ай­налғанына шын жүрегінен қуанатынын жеткізді. Еңбек ардагері Ешен қажы Қырықбаев Мәжіліс депута­тына батасын берді. Кездесуде Мәжіліс депутаты Нұртай Сабильянов Парламенттің құры­лымы, Мәжілістің заң шығару қызметі жайлы айтып берді. Мемлекет басшысының пар­ла­ментшілердің алдына қой­ған міндеттеріне тоқ­та­лып өтті. Қонақтар Парла­менттің бірлескен отырыс залын және Мәжілістің жалпы отырыс залын аралап көрді. Кездесуде ұзақ жыл ұс­таздық етіп келе жатқан Алма­гүл Омарова, Гүлия Тұрған­баева «Нұр Отан» партия­сынан сайланған халық қа­лаулысына ризашылықтарын айта келіп, туған жерінің тілегін жеткізді, деп хабарлады Мәжілістің баспасөз қызметі.