Жақында Астанада «Қазпошта» акционерлік қоғамы өзінің «Спорт» сериясы бойынша алдағы VII Қысқы Азия ойындарына арналған төрт түрлі пошта маркасын шығарды. Мұны Туризм және спорт министрлігінде өткен рәсімді аталмыш акционерлік қоғамның басқарушы директоры Андрей Вагнер мен VII Қысқы Азия ойындарын ұйымдастыру комитетінің Атқарушы дирекциясының бірінші вице-президенті Айбек Қапақов хабарлады.
Атаулы маркалардың номиналдары алуан түрлі. Айталық, «Тұғырдан секіру» және «Мәнерлеп сырғанау» маркалары 240 теңге тұрса, «VII Қысқы Азия ойындарының эмблемасы» және «Фристайл» белгілерінің бағалары 190 теңгеден аспайды. Ал маркалардың өлшемдері 28х40 мм көлемді болса, әрбірінің таралымы 50 мың дананы құрайды. Олардың парақтағы сандары 8 данадан, перфорациясы иректелген, төрт бояулы офсетті баспамен басып шығарылған. Маркалар бейнелерін суретші Данияр Мұхамеджанов бедерлеп дайындаған.
Тағы бір айтатын нәрсе, акционерлік қоғам пошта маркаларымен қатар алғашқы күннің хатқалтасын және арнайы пошта мөртабанын да жасап шығартқан екен. Рәсім кезінде: «Қазпошта» акционерлік қоғамы осынау маңызды оқиғадан тыс қалмай, пошта маркалары мен филателистік белгілерді шығару арқылы, ел үшін елеулі болып табылатын шараға өзінің қолдауын көрсетіп келеді», – деді А.Қапақов. Сөзінің түйінінде: «1994 жылдан бері ұлттық пошта операторы «Спорт» сериясы бойынша, әлемдегі ең елеулі спорттық жарыстардың құрметіне, еліміз спортшыларының алуан қилы жеңістеріне арналған 43 түрлі пошта маркасын шығарған. Соның ішінде В. Смирновтың алтын медалі, Атланта, Лиллехамер, Солт-Лэйк-сити, Турин, Ванкувер, Афина, Бейжің Олимпиадалары, ФИФА ұйымына 100 жыл, Қазақстанның Олимпиададағы чемпиондары, ОАР-дағы футболдан әлем чемпионаты сынды маркалар бар. Аталған маркалар филателистердің арасында үлкен қызығушылыққа ие болады деп сенемін», – деді ол жиналғандарға.
Суреттерді түсірген Орынбай БАЛМҰРАТ.
