Жыл үздіктері анықталды

Астанада алғаш рет жаңа жыл мерекесі қарсаңында «Шабыт - 2010»  байқауы ұйым­дастырылып, оның жеңімпаздары белгілі болды. «Шабыт» қоғамдық қорының мақсаты – жылды үздік жетістіктермен аяқтаған талантты жастар мен олардың шығармашылығына қолдау көрсетіп, мә­дениет пен өнер саласында аянбай қызмет етіп жүрген ұжымдарды одан әрі ынта­ландыру десек, «Шабыт-2010» сый­­лығын тұңғыш рет қазақстандық өнерпаздар иеленіп отыр. Бұл ор­айда «Шабыт» қоғамдық қорының атқарушы директоры Талант Төле­беков: «Байқаудың іріктеу кезе­ңінде мықты­лар­ды таңдауда зерттеу және әлеуметтік сауалдарды жүргізу әдісі қолданылды. Зерттеу барысы қараша айының бірінші жұлдызынан басталып, желтоқсан айының біріне дейін созылды. Ондағы мәліметтерді өңдеу барысы 15 күнге жалғасты. Қазақстанның беделді қай­раткерлерден құрылған тәуелсіз қазылар тобы «Ең үздік» деп танылған қазақстандық мә­дениет және өнер саласының 2010 жылғы майтал­мандарын анықтады», – деді. Үш номинация бойынша іріктелген байқау же­ңімпаздары Қазақ Ақпарат агенттігінің баспасөз конференциясына арналған залында мәлім болды. Осыған сәйкес, «Мәдениет саласына сіңірген еңбегі мен жастар шығармашылығының өркендеуіне айрықша үлес қосқаны үшін»  Мәдениет министрі Мұхтар Құл-Мұхаммед «Жыл үздігі» атанды. 2010 жылы «Мәдениет пен өнер саласында жеткен жетістігі үшін» елордалық филармонияның хореографы Әділ Еркінбаев пен белгілі балет бишісі Гүлфайруз Құрманқожаевалар марапатталса, «Жаңа толқын» байқауында күміс көмей әнші Қай­рат Түнтеков пен жас режиссер Қанағат Мұстафин жеңімпаз атанды. Сонымен қатар, кино әлемінде ерекше көзге түсіп жүрген қыздардың бірі Қар­лы­ғаш Мұхамеджанова мен цирк өнерінде сайқымазақ бейнесін шебер сомдаушы Мұрат Мұтұрғанов мә­дениетті жандандыруға қосқан үлестері үшін аталған номинацияның жүлдегерлері деп танылды. Ал «Жастар шығармашылығына қолдау көр­сет­кені үшін» номинациясы бойынша жас өнерпаз­дарымыздың бір жыл ішінде Еуропаның бірнеше елі мен  АҚШ сахналарынан көрінулеріне мол мүмкін­дік жасаған скрипкашы Айман Мұсақожаеваның аты алдымен аталды. Сонымен қоса, Өнер акаде­мия­сының тізгінін ұстап отырған Арыстанбек Мұха­ме­диұлы, жақында ғана экранға жол тартқан «Жұл­дызды коктейль» фильмін түсірген продюсер Баян Есентаева дарындардың көзін ашқан тұлғалар ретінде БАҚ өкілдеріне жария етілді. Жаңа есімдерді халық арасында танымал етуде ақпарат құрал­да­рының еңбегі зор екендігі баршаға мәлім. Осы тұрғыдан алғанда, «Казахстанская правда» газеті, «Қазақ Ақпарат агенттігі» ҰК» АҚ, «Тенгри» ра­диотолқыны мен «Хит ТВ» арнасы да алдыңғы толқыннан көрінді. «Мәдениет пен өнер саласында сапалы қызмет көрсеткені үшін» мәдени ошақтар, театр мен мұра­жай ұжымдары марапатталды. Олардың қатарында Ә.Қастеев атындағы өнер мұражайы, Жамбыл ат­ын­дағы Қазақ мемлекеттік филармониясы, К.Байсейітова атындағы Ұлттық опера және балет театры, «Құ­ланшы» қазіргі заман өнері орталығы, «Қазақ әуен­дері» АҚ мен «Кинопарк» кинокомпаниясы да бар. Жұлдыз БАЙДІЛДА.