Жас сарбаздар ант қабылдады

Біздің халық ежелден Отан үшін төккен тердің бағасын бағамдай білген. Оның ішінде қастерлі Отан-Ананы қорғау ең асқақ парыз, абыройлы міндет екенін жас сарбаздар да жақсы біледі. Ант қабылдау – Отаныңа, халқыңа адал болу, ел басына күн туса, оны ақтық демің қалғанша қорғау, қажет болса, жан қию деген сөз. Осылайша, ант қабылдаған сарбаз – біздің ұлан-ғайыр жерімізді ақ білектің күшімен, ақ найзаның ұшымен қорғаған жаужүрек ата-бабаларымыздың ерлік жолын жалғастырушыға, елдің қорғанына, сенім арқалаған азаматқа айналмақшы. 10 қаңтарда Ұлттық ұланның құрылғанына 24 жыл толды. Айтулы датаға орайластырып еліміз бойынша Отан алдындағы әскери борышын өтеуге шақы­рылған жас сарбаздардың салтанатты түрде ант қабылдау рәсімін өткізу дәстүрге айналған. Осы күні әскери антты Астана гарнизоны бойынша 200-ден астам жас жауынгер қабылдады. Айта кетейік, бұл жолғы ант қабылдау рәсімі өзінің ауқым­дылығымен ерекшеленіп отыр. Біз куә болған шарада елор­дадағы 6636-әскери бөлімінің жас сарбаздары серт берді. Отан үшін отқа түсер азаматтарымыздың өміріндегі бұл жауапты қадам жасау шарасына ІІМ басшылығы, Ұлттық ұлан бас қолбасшылығы, өзара іс-қимыл жасайтын орган­дардың, Астана қаласы әкім­дігінің басшылары, сондай-ақ, ант қа­былдаушылардың ата-ана, туған-туыстары қатысты. Жауынгерлер қатарын еліміздің түкпір-түкпірінен әскерге алынған жас сарбаздар құрады. Сондай ыждағатты дайындықтың жемісін алаңға жиналған көпшіліктің жауынгерлерге деген ерекше ықы­ласынан аңғаруға болатын еді. Жауынгерлік ту салтанатты түрде сап түзеген сарбаздардың нақ ортасына әкелінген соң шараның шымылдығы түріліп, жауынгерлер ант қабылдауға кірісті. Әсіресе, сарбаздарға арнаған құттықтау сөздерден: – Ұлттық ұлан жауынгерлері, бүгін сендер әскери ант қабылдай отырып, туған елің – Қазақстан Республикасына, қастерлі хал­қы­мызға және оның заңды сай­ланған Президентіне ақтық демің қалғанша адал қызмет етуге серт бердіңдер. Бұл – сендердің өмірлеріңде ерекше есте қалар сәт әрі ер еншісі – ел қорғауға басқан қадамдарың, – деген секілді патриоттық рух беретін небір жалынды сөздер жауынгерлер жігерін жанып, оларды одан әрі қайраттандыра түсті. Иә, Отан алдындағы борыштарын өтеу бақыты елордада бұйырған жас сарбаздар үшін ендігі міндет – ел тыныштығын кірпік қақпай күзету, азаматтар құқықтарының қорғалуын қамтамасыз ету, қылмысқа қарсы күрес жүргізу. Раушан СҮЛЕЙМЕНОВА, журналист. АСТАНА. Суреттерді түсірген Ерлан ОМАРОВ.