Алматыда мүгедектерді Мәжіліске сайлау мәселесі көтерілді

АЛМАТЫ. 19 қаңтар. Алматыда «Мүгедектерді  Мәжіліске және Мәслихатқа сайлау» тақырыбында баспасөз мәслихаты өтті. Бұл туралы egemen.kz тілшісі хабарлады. Қазақстан баспасөз клубы ұйымдастырған жиынға Қазақстан мүгедектер ұйымы одағының төрағасы Әли Аманбаев, «Шырақ» мүгедектігі бар әйелдер қауымдастығының төрайымы Ләззат Калтаева, «Намыс» жоғары білімі бар мүгедектер қоғамдық бірлестігінің төрағасы Қайрат Иманалиев қатысып, көтерілген мәселелерге қатысты ұстанымдарын білдірді. «Бүгінгі таңда Мүгедектердің құқықтары туралы конвенция бекітілген. Осы Конвенцияға сәйкес мүгедектер мүгедектігі бар адамдарға байланысты  түрлі стратегияларды, саясатты және бағдарламаларды әзірлеуге қатысуы тиіс. Сонымен қатар, бұл Конвенция мүгедектерді үкіметтің атқарушылық және заң шығарушы органдарының жұмысына белсенді қатысуға шақырады Осыған орай, Мәжілістің өз еркімен тарағаны туралы және Мәжіліс пен Мәслихатқа қос сайлауды қатар өткізу жайлы шешімді қолдаймыз. Ұлттық деңгейде Мәжіліске және аймақтық деңгейде Мәслихатқа мүгедектігі бар адамдар арасынан депутат сайлайтын уақыт келді. Мүгедектер арасында заң актілерін әзірлеуге, түрлі зерттеулер жүргізуге, арнайы әлеуметтік қызмет ұсыну бағдарламаларын жасауға белсене қатысқан жоғары білімді жандар бар. Сондықтан, ондай адамдардың Парламент және Мәслихат жұмыстарына қатысуы қажет деп ойлаймыз. Олардың білек түріп, ұлттық және аймақтық деңгейде заң шығару қызметіне белсене араласуы мүгедектердің тұрмыс сапасын жоғарлату үшін лайықты жағдай жасауға мүмкіндік береді. Барлық партияларды Мәжіліске және Мәслихатқа өздерінің сайлау тізімдеріне мүгедектер ұйымдарының өкілдерін енгізуге шақырамыз», – деді баспасөз мәслихатында сөз алғандар. Айнаш Есали. Дерек, сурет: egemen.kz.