Бейжің билігі қала халқының санына шектеу қоймақ

АСТАНА. 24 қаңтар. Қытай астанасы – Бейжің қаласының билігі шаһар халқының санын 2020 жылы 23 миллионнан асырмауды жоспарлап отыр. Оған мегаполис тұрғындарын қамтамасыз ететін ресурстардың тапшылығы себеп болып отыр. Бұл туралы ТАСС агенттігіне сілтеме жасаған egemen.kz тілшісі хабарлады. «Синьхуа» агенттігінің хабарлауынша, Қытайдың заң шығарушы органы – Халық өкілдерінің жиналысы мен қаланың Халықтық саяси консультативті кеңесінің жиынында Бейжіңнің әлеуметтік, көлік қатынасы және экономикалық ресурстарына баға беріліп, осындай мәселе көтерілген. Бүгінде ел астанасындағы ең өзекті мәселелердің бірі сумен қамтамасыз ету екенін атап өткен жөн. Қала мэрі Ван Аньшуньнің айтуынша, алдағы бес жылда халықты мегаполистің орталығынан шет аудандарға орналастыру жұмыстары жүргізіледі. Соған орай, орталықтағы тұрақты тұрғындар санын 2014 жылғы көрсеткіштен 15 пайызға азайту көзделіп отыр. Айта кетейік, 2015 жылғы санақ қорытындысы бойынша, Бейжіңде 21,7 миллион адам тұратыны анықталды. Жергілікті билік 2016 жылдың соңына дейін бұл көрсеткішті 22 миллионнан асырмауды жоспарлап, соған қатысты бағдарламаларды қолға алуда. Еламан Қоңыр. Дерек: ТАСС. Сурет: kalipsoua.com.