• 27 Қаңтар, 2016

Ынта-жігерімді қамшылады

348 рет

көрсетілді

3 мин

оқу үшін

Egemen Qazaqstan

Әр адамның алдына қойған биік мақсаттары болады. Кім де болса, оған маңдай тері, парасатты білімі мен салиқалы сабыры, шынайы сезімі арқасында ғана жете алатынын сеземін. Алайда, маған өз мақсатыма жақындаған сайын оған жету жолы қиындай түсетін сияқты көрінетін. Үлкен мұратқа жету жолында алда әлдеқандай кедергілер көбейсе, кідіріс жасап қаламын ба деген қорқыныштар да жоқ емес еді. Осындай үміт пен күдік тұмшалаған сауалға толы сәттерімде сенімді серігіме айналып, болашаққа деген ынта-жігерімді қамшылаған қамшыгердей болған, шырмауықтай ойымның шешуші күшіне айналып, періште көңілімнің парасатты патшасындай көрінген Елбасының данышпандыққа толы Ұлт Жоспары жарқын болашақтың келісті келбетіндей, мен үшін ғұмырлық сабақ, өмірлік өнегеге айналды. Сондықтан болар, бүгінде жарық жұлдыздай биік болғанымен жақын мақсаттар қол бұлғағандай көрінеді. Ол мұрат кемел білім, еңселі еңбек, тамырлы татулықпен тұтасып тұрғандай. Иә, жас ұрпақ ел болашағының алтын кілті білімде екенін мойындайды. Бұл жөнінде көрнекті ағартушы Ш.Уәлиханов осыдан бірнеше ғасыр бұрын «Халық кемеліне келіп даму үшін екі-ақ нәрсе керек. Оның біріншісі – азаттық, екіншісі – білім», десе дәстүрлі әр Жолдауында Елбасы Н.Назарбаев «Бұл заман білекке емес, білімге сенетін заман. Заманауи әлемде елдің қуаты, ең алдымен, білім мен ғылымда болатынын түсінетін уақытқа келдік. Енді білімді қажетке, тұрмыс игілігіне жарата білуіміз керек. Инемен құдық қазғандай, қиын да күрделі, орасан қажыр-қайрат пен ерік-жігерді талап ететін білімсіз өмір тұл», дей келе терең білім тәуелсіздігіміздің тірегі, ақыл-ой азаматтығымыздың алдаспаны екенін баса айтып келеді. Заманымыздың заңғар жазушысы М.Әуезов «Халық пен халықты, адам мен адамды теңестіретін білім» дегендей, заманауи әлемде елдің қуаты, ең алдымен, білім мен ғылымда болатынын сезінер уақытқа жеттік. Елбасының арманға бастар Ұлт Жоспары біздерді білім қууға, шет тілдерін үйреніп, еліне адал еңбек етуге шақырады. Сондай-ақ, жалқаулыққа салынып, оқымағандардың көш соңында қалатынын ескертеді. Жолдау барысында түйгенім, қоғамымызда адал еңбекті кемел біліммен ұштастырғанда ғана табысқа қол жеткіземіз. Тақырыбы терең, мазмұны мағыналы Елбасының жаңа жағдайдағы жаңашыл Жолдауы жас ұрпақты білім соқпағында талмай еңбек етуге жетелейді. Құс қанатымен, адам қиялымен бақытты демекші, арманымды арғымағына отырғызып, талабыма тұлпар болған Елбасы мақаласы болашағыма бастау, дәстүріме дәрмен, пәктігіме пәрмен, тарихыма тамыр, күтер күніме қуат, ертеңіме шуақ болары сөзсіз. Ақниет ПАЗЫЛОВА, №132 орта мектебінің 11-сынып оқушысы. Қарағанды облысы, Жаңаарқа ауданы.