• 27 Қаңтар, 2016

Келісімдер келісілген ресми сапар

285 рет

көрсетілді

1 мин

оқу үшін

Egemen Qazaqstan

Қазақстанның Қорғаныс министрі Иманғали Тасмағамбетов Иорданияға ресми сапармен барды. Оның шеңберінде Иордания мемлекетінің және қорғаныс ведомствосының басшыларымен ресми кездесулер өтті. Кездесуде әскери және әскери-техникалық ынтымақтастық аясындағы мәселелер талқыланып, өзара іс-қимыл перспективалары белгіленді. Сапардың басты мақсаты әскери және әскери-техникалық ынтымақтастық туралы Қазақстан Республикасы мен Иордания Хашимит Корольдігінің Үкіметі арасында келісімге қол қою болды. Бекітілген құқықтық негіз екі елдің қарулы күштері мен қорғаныс өнеркәсібі арасындағы ынтымақтастықты дамытуға ықпал етеді. Сапар барысында өткен жылдың соңында Елбасы Астанада ашқан «Қазақстан Парамаунт инжиниринг» компаниясы зауытының өнімі – «Арлан» қазақстандық брондалған дөңгелекті машиналарды сатып алу жөніндегі уағдаластыққа қол жеткізілді. Сонымен қатар, түнгі көру аспаптарының ОПК-оптикалық аспаптары мен көздеуіштер, 12,7 калибрлі НСВС оқшашарлары және олардың қолданылуымен жауынгерлік модульдер, 3 координаталы РЛС, байланыс құралдары және тағы басқа жарақтарды жеткізу бойынша келіссөздер жүргізілді. Иордания Хашимит Корольдігі Қарулы күштері Штабтар бастықтары біріккен комитетінің төрағасымен кездесуде қабылдаушы тараптың «KADEX-2016» қару-жарақ пен әскери техниканың IV халықаралық көрмесіне қатысатыны белгілі болды. Ал халықаралық көрмеде қорғаныс өнеркәсібі саласындағы ірі жаһандық компаниялардың қару-жарағы мен техникасы ұсынылатын болады. Шараға әскери мақсаттағы жетекші өндіруші елдердің бірқатар ресми өкілдері қатысады деп күтілуде. Жер шалғайлығы мен қашықтығына қарамастан, екі ел арасында экономикалық, әскери-саяси ынтымақтастықты дамытуда үлкен мүмкіндіктер бар екенін айта кеткен жөн. «Егемен-ақпарат».