Алматыда балабақшалар құны екі есе арзандайды

АЛМАТЫ. 28 қаңтар. Алматы қалалық мәслихатының 50-ші сессиясында депутаттар мемлекеттік балабақшаға баратын әрбір бала үшін төленетін ақы құнын 15 мың теңгеден асырмау жөнінде қаулы қабылдады. Бұл туралы Алматы қаласы әкімінің баспасөз қызметіне сілтеме жасаған egemen.kz тілшісі хабарлады. Естеріңізге сала кетейік, «Нұр Отан» партиясының Алматы қалалық филиалының депутаттар  фракциясы 2016 жылдың 22 қаңтарында қаладағы мемлекеттік балабақшаларды шаруашылық есептен мемлекеттік тапсырысқа көшіру туралы бастама көтерген еді. Осылайша, биылғы жылдың 1 ақпанынан бастап екі жастан бес жасқа дейінгі мемлекеттік балабақшаға баратын 17 мың бүлдіршін үшін тек тамақтану құны ғана төленетін болады. Бұл үшін жергілікті бюджеттен өткен жылдың қорытындысы бойынша, үнемделген қаржыдан 3 миллиард теңгеге жуық қаржы бөлінеді. «Бізде тұрмысы төмен жандардың проблемаларын шешу мүмкіндіктері бар. Сондықтан бүгін балабақшалар құнын өсірудің орнына біз 17 мың бүлдіршіннің құнын төмендетіп отырмыз, осының арқасында әрбір отбасы 20 мың теңге көлемінде қаржысын үнемдейтін болады», – деді сессия барысында Алматы қаласының әкімі Бауыржан Байбек. Бұдан өзге мемлекеттік балабақшада жұмыс істеп, 48 мың теңге көлемінде орташа жалақы алатын 3360 тәрбиешіге 30 пайыз қосымша ақы төленетін болады. Айнаш Есали. Дерек, сурет: egemen.kz.