Ел мерейі үстем болады

Төтенше жағдайлар сала­сын­дағы еліміздегі бірегей Көк­шетау техникалық институтын­да Елбасының Қазақстан хал­қына арнаған Жолдауын түсін­діріп, насихаттау жөнінде кеңес болып өтті. Оны институт бас­шы­сының орынбасары, подпол­ковник Сайранбек Бекмағам­бетов ашып, кезекті Жолдау көкейкесті мәселелерді көтеріп отырғандығын атап өтті. Одан әрі сөз алған облыстық ішкі саясат басқармасының басшы­сы Айна Мысырәлімова 1 қаң­тардан бастап 5 институттық реформаны жүзеге асыру бойын­ша «100 нақты қадам» Ұлт Жос­парын орындаудың практикалық кезеңі басталғанын, бұл барлық қиындықтарды жеңуге сеп болаты­нын және ұлт мүддесі үшін жасалған бағдарлама екен­дігін тілге тиек етті. Сондай-ақ, бүгінгі дағдарыс уақытында жастардың бірқатары жұмыссыз жүргендігі, бізде құрылысшы, элек­трик сияқты мамандардың жетіс­пейтіндігі, осыған орай жас­тардың әмбебап мамандықтарды игеруі қажеттігі туралы пікірлерін ортаға салды. Жолдау жүктеген міндеттің бірі осы болып табылады. Подполковник Дәулет Шая­химов Президент Жолдауының «Мәңгілік Ел» болуды мақсат еткен мән-маңызына тоқталып, бұл жастарға да орасан жауап­кер­шілік жүктейтінін алға тартты. Оқу-әдістемелік бөлімінің аға оқытушысы, капитан Әсем Бек­мұхамбетова өз сөзін ұлт болашағы білімді жастардың қолында деп түйіндеді. Жолдаудың қоғамымыз үшін алар орны ерекше екенін жақ­сы білетін жастар да сөз алып, әлемді дүрліктіріп жатқан қиын­дықтардан ойдағыдай шыға­тындығымызға, өздерінің парызы туған елін, Отанын көздің қара­шығындай қорғау екеніне нық сенімдерін білдірді. Бақберген АМАЛБЕК, «Егемен Қазақстан». КӨКШЕТАУ.