Солтүстік Қазақстан майдангерінің туыстарына іздеу салынды

Петропавл. 1 ақпан. Ресейдің Астрахань облысында жұмыс істейтін қызыл ізшілдер солтүстікқазақстандық әріптестеріне арнайы хат жазып, майдан даласында сүйегі табылып, аты-жөні анықталған Прокопий Третьяков есімді майдангердің туыстарын іздеп табуға көмектесуді өтінген. Бұл туралы  Петропавлдағы «Іздеу» («Поиск») отрядына сілтеме жасаған egemen тілшісі хабарлады. Прокопий Третьяков – Қызылжар өңірінің тумасы. 1922 жылы туған. Армия қатарына Булаев ауданы (қазіргі Мағжан Жұмабаев) Малиновка ауылынан шақырылған. 1942 жылы хабарсыз кеткен. Былтыр Жеңістің 70 жылдығы қарсаңында ресейлік қызыл ізшілдер қанды шайқастар өткен Хулхута елді мекенінің маңайын қазу барысында 12 қазақстандық жауынгердің сүйегін тауып, аты-жөндерін нақтылаған. Солардың бірі Прокопий Третьяковтың туыстарына іздеу салып, теріскейдегі әріптестеріне өтініш жолдапты. Туыстары табылып жатса, жеке заттарын табыстауға уәде беріп, мекен-жайлары мен телефондарын қалдырған. Өмір Есқали. Дерек: «Іздеу» отряды. Сурет: express-k.kz.