Алматыда көлеңкелі бизнеске қарсы күрес қарқын алды

АЛМАТЫ. 1 қаңтар. Алматыда көлеңкелі бизнеспен күрес қарқын алды. Бұл туралы Алматы қалалық мемлекеттік кірістер департаментінің баспасөз қызметіне сілтеме жасаған egemen.kz тілшісі хабарлады. Бүгінгі күні еліміздің Дүниежүзілік сауда ұйымына мүше болуына байланысты көптеген тауарлардың кедендік баж ставкалары төмендетілді. Соның нәтижесінде орта есептегі кедендік тариф 10,4 пайыздан 6,5 пайызға төмендеді. Бұған қоса, осы жылдың 1 мамырынан бастап, сыртқы экономикалық қызметтің тауарлық номенклатурасы бойынша төмендетілген ставкадағы кедендік баж салығы тағы да кезең-кезеңімен енгізіле бастайды. Бұл сыртқы экономикалық қызметке қатысушылар мен салық төлеушілерге жасалған үлкен жеңілдік. Алайда, төмендетілген ставкамен әкелінген тауарлар шартты түрде шығарылған болып есептеледі де, Еуразиялық экономикалық одаққа мүше елдердің аумағына апаруға тыйым салынады. Сондықтан да осы талаптардың орындалуын бақылау мақсатында Алматы қалалық мемлекеттік кірістер департаментінде арнайы үйлестіру тобы құрылып, өз жұмысын бастап кетті. Атап айтсақ, осы жылдың 28 қаңтарына дейінгі мәлімет бойынша, 41 салық төлеушінің Дүниежүзілік сауда ұйымының төмендетілген баж ставкасымен әкелінген тауарларының жалпы құны 3,5 миллиард теңгені, жалпы салмағы 1,4 миллион килограмды құрады. Олардың ішінде 11 салық төлеушінің қызметіне хронометраждық тексеру жүргізіліп жатыр. Осы орайда, төмендетілген ставкамен тауар әкелетін сыртқы экономикалық қызметке қатысушылар мен салық төлеушілерге қойылатын басты талаптың бірі – электрондық есеп фактурасымен жұмыс істеу болып табылады. Бұл талап Еуразиялық экономикалық одақтың «Қазақстанның Дүниежүзілік сауда ұйымына қатысуын жүзеге асыру туралы» хаттамасымен заңдастырылған. Сауда-саттықтың электрондық есеп-фактурасы түріне көшу қағазбастылықты азайтып қана қоймайды, салықтық әкімшілдендіру жұмыстарын жақсартып, көлеңкелі экономика мен жалған кәсіпкерлікпен айналысуға жол бермейді. Яғни, бюджетке түсетін салық пен басқа да төлемдерді бақылау шараларын жеңілдетеді. 28 қаңтар күні үйлестіру тобының мүшелері кезекті рейд барысында «Мерседес» маркалы жүк көлігін тоқтатты. Тексеру барысында көлік иесі Қытай Халық Республикасында шығарылған тауарлардың Қазақстанға әкелу заңдылығын дәлелдейтін құжаттар көрсете алмады. Бұл факті бойынша экономикалық тергеу қызметінің қызметкерлері тарапынан қылмыстық іс қозғалып, алдын ала тергеу шаралары жүргізілуде. Айнаш Есали. Дерек: egemen.kz. Сурет: nur.kz.