Қызылордада дәстүрлі Әбіл Қалымбетов турнирі аяқталды

ҚЫЗЫЛОРДА. 1 ақпан. Қызылордада облыстық дене шынықтыру және спорт басқармасының ұйымдастыруымен футзалдан ардагерлер арасында белгілі футболшы Әбіл Қалымбетовты еске алуға арналған облыстық турнир өтті. Бұл туралы облыстық денешынықтыру және спорт басқармасына сілтеме жасаған egemen.kz хабарлады. Турнирге Қызылорда, Байқоңыр қалалары мен аудандардан 40 жас және одан жоғары жастағы 12 командадан 200-ге жуық ардагерлер қатысып, үздіктері анықталды. Екі күнге созылған жарыстың қорытындысы бойынша «Петро Қазақстан» командасы «Қайсар» командасын 3:1 есебімен жеңіп, екінші мәрте жеңімпаз атанды. Байқоңырлық «Инфракос» командасы үшінші орынды иеленсе, «Ардагер» командасы төртінші орынды  қанағат тұтты. «Үздік қақпашы» номинациясы бойынша Октябрь Жүсіпов (Инфракос), «Үздік қорғаушы» – Берік Жаппасбаев (Ардагер), «Үздік шабуылшы» – Ғани Махамбетов (Петро Қазақстан), «Мерген ойыншы» – Марат Сәрсенов (Қайсар), «Үздік ойыншы» – Әлімхан Жүсіпбеков (Петро Қазақстан) марапатталды. Ержан Байтілес. Дерек, сурет: egemen.kz