Кітаптарын мектебіне тапсырды

Бүгінде Астана қаласының тұрғыны, зейнеткер, экономист Өзбек Қазиханов өмір бойы жинаған мың жарымға жуық кітабын туған жері Торғайдағы өзі оқыған мектебіне сыйға тартты. Көп жылдар бойы есеп-қисап, экономика саласында лауазымды қыз­меттер атқарған Өз­бек Қазиханов Алматы халық шаруашылығы инс­титутының түлегі, Еңбек ардагері, КСРО халық шаруашылығын жос­парлаудың үздігі. Ол зейнет жасына дейін ел экономикасының дамуы жолында аянбай еңбек етті. Ө.Қазиханов бұрынғы Торғай облысы, Жангелдин ауданы, Қызбел кеңшарында 1947 жылы алғаш рет Ақсуат жетіжылдық мектебінің табалдырығын аттаған екен. «Өзім жеті жыл оқы­ған мектебіме жеке кітап­ханамды сыйға тартуды жөн көрдім. Бұл кітаптар 50 жыл бойы жиналды. Мақсатым – жиып-терген рухани азық, кітап қорым келешек ұрпаққа қызмет қылсын», дейді зейнеткер Ө.Қазиханов. Оның жеке кітапхана қорында мың жарымға жуық кі­тап болған. Кітаптарды негізінен бірнеше бө­лімге топтастыруға бо­лады. Ай­талық, қазақ жазу­шы­ларының еңбектері, оның ішінде Алаш арыстарының шығар­ма­лары, одан кейін қазақ совет жазушыларының шы­ғармалары, тағы бір бө­лігі жерлес ақын-жа­зу­шы­лардың шығармалары. Кітапхана қорында Абай, Жамбыл өлеңдері, ақындар айтысы, «Бес ғасыр жырлайды» деген елеулі ең­бек­терге де ерекше орын берілген. Сондай-ақ, орыс жазушыларының, шетел жазушыларының еңбек­тері, қолбасшылардың естеліктері, мәдениет қай­раткерлерінің еңбектері, Қазақ совет энциклопедия­сы, әскери патриоттық және орыс патшалары туралы кітаптар, сонымен қа­тар, бірқатар танымдық, эко­номикалық анықтамалар бар. «Егемен-ақпарат».